Նախօրեին Հայ հեղափոխական դաշնակցության բյուրոյի երիտասարդական գրասենյակի «Վերելք» բիզնես-ճամբարի կողմից կազմակերպվել է մետ երեք ամիս տևած բիզնես֊ դասընթացի ամփոփում:
Ամփոփվել են բիզնես֊ դասընթացի արդյունքները. լավագույն ծրագրերը կֆինանսավորվեն
ՍՏԵՓԱՆԱԿԵՐՏ, հունիսի 19, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ միջոցառմանը մասնակցել են այդ ընթացքում իրենց լավագույնս դրսևորած 11 թիմեր:
«Ծրագրի նպատակն է Արցախի երիտասարդությանը զինել գործնական գիտելիքներով, տեխնիկական հմտություններով և ֆինանսական կապիտալով՝ իրենց բիզնես գործունեությունը Արցախում սկսելու համար: Ծրագիրը հովանավորվել է Արևելյան Ամերիկայի «Արցախ» ֆոնդի կողմից:
Մենք թիրախավորել ենք վեց հիմնական ոլորտներ՝ բջջային հավելվածների ստեղծում, հյուրընկալություն և զբոսաշրջություն, կայուն գյուղատնտեսություն, կանաչ էներգետիկա, սնունդ և ըմպելիք, նորարարական գյուղատնտեսություն: Շուրջ երեք ամիս տևողությամբ այս ծրագրի շրջանավարտները ընտրվել են արցախցի 109 երիտասարդներից, նրանք ընթացքում մասնակցել են դասախոսությունների, կատարել են գործնական առաջադրանքներ, իսկ այսօր ընտրված լավագույն 11 թիմերը հնարավորություն են ստացել սեփական բիզնես- գաղափարները ներկայացնելու ժյուրիի, ներդրողների և հանդիսատեսի առջև, և լավագույնները կստանան ֆինանսավորում դրանք իրականացնելու համար»,-մեզ հետ զրույցում նշել է ծրագրի դասախոս, «ՓՐՈՓՐ ՔՈՄՓԸՆԻ» ընկերության համահիմնադիր Մարիաննա Վարդանյանը:
Ծրագրի հաղթողներ են ընտրվել Վահե Մարտիրոսյանի «Մարտիրոսյան Բերրի», Սյուզաննա Մարգարյանի «Շուշվա նեկտար», Տիրուհի Գասպարյանի «Նրբաստեղծ» բիզնես-ծրագրերը: