Այսօր՝ հունիսի 19֊ին, արցախցի երիտասարդները ուխտագնացություն կատարեցին դեպի Բովուրխանի վանք։ Ուխտագնացությանը մասնակցեցին ավելի քան 100 երիտասարդ-ուխտավորներ՝ հասարակական կազմակերպությունների ներկայացուցիչներ, կամավորականներ, զինվորներ, ինչպես նաև պաշտոնատար անձինք:
Երիտասարդները ուխտագնացություն կատարեցին դեպի Բովուրխանի վանք (լուսանկարներ)
ՍՏԵՓԱՆԱԿԵՐՏ, 19 հունիսի, ԱՐՑԱԽՊՐԵՍ։ Ծրագիրն իրականացրել է ԱՀ ԿԳՄՍ նախարարությունը՝ ԱՀ պաշտպանության բանակի հետ համատեղ:
Ծրագրի նպատակն է՝ նպաստել երիտասարդության ռազմահայրենասիրական, հոգևոր-մշակութային դաստիարակությանը, բանակ-հասարակություն կապի ամրապնդմանը, երիտասարդության ազգային ինքնության պահպանմանը:
Պաշտպանության բանակի ավագ գնդերեց Գոռ սարկավագ Գյուրջյանը համարում է, որ առավել քան տեղին է ուխտագնացությունը պատերազմից հետո, և շատ ոգևորիչ է, որ ուխտագնացությանը մասնակցում են պաշտպանության բանակի զինծառայողները, երիտասարդությունը և մշակույթի հետ առնչվող մարդիկ:
«Ամեն անգամ, երբ մենք գալիս ենք որևէ սրբավայր, նպատակն այն է, որ վերանորոգենք մարդ-Աստված կապը, գանք և Աստծո առաջ մեզ հաշվետվության ենթարկենք, ինչ ենք կատարել կամ ինչ չենք տեղին կատարել», - «Արցախպրես»֊ի թղթակցի հետ զրույցում նշեց նա:Մշակույթի վաստակավոր գործիչ Սլավա Սարգսյանը ներկայացրեց վանքի անվան ստուգաբանությունը և պատասխանեց մասնակիցների հարցերին, որից հետո հավելեց.
«Վանքը գտնվում է անշուք վիճակում և վերականգնման նախագիծը պատրաստ է, պարզապես պատերազմը խանգարեց, որպեսզի նորոգման աշխատանքները սկսվեն»:Արցախի թեմի առաջնորդության քարտուղար Դավիթ Փաշայանի կարծիքով՝ ամեն ինչի գագաթնակետը հոգևորն է:
«Եթե ուզում եք երջանիկ լինել, պետք է հոգևոր սնունդով լցվեք: Պետք է մեր մեջ ունենանք բավականաչափ սրբության ձգտումը, որը սնուցում է մեր օրվա կենսունակությունը: Սրբությունն է, որ մարդուն տանում է հաղթանակների », - մեզ հետ զրույցում շեշտեց նա:Ներկաները վանքում մասնակցեցին ժամերգությանը:
Կազմակերպվեցին ավանդական խաղեր, որոնց իրենց ակտիվ մասնակցությունն ունեցան երիտասարդները:
Հնչեցին հայրենասիրական երգեր և ազգային պարեր:
Ուխտագնացության մասնակիցները հնարավորություն ունեցան մասնակցելու մշակութաժամանցային ծրագրին, հոգևոր և պատմամշակութային թեմայով զրույցների:Նշենք, որ Վանքը գտնվում է Արցախի Հանրապետության Ասկերանի շրջանում՝ Բովուրխան լեռան հյուսիսային լանջին: Այն հիմնել է Շախնազարյանների իշխանական տոհմի նշանավոր մելիք` Վարանդայի իշխան Բաղրը: Նա իշխել է XVIIդ. առաջին կեսին մինչև 1646թ.: Սարը և վանք-ամրոցը մելիքի անունով կոչվել է Բաղրխան: Անվանումը հետագայում վերափոխվել և դարձել է Բուրուխան, Բովրխան, Բովուրխան:
Բովուրխանավանքի վանական համալիրը բաղկացած է եկեղեցուց, տնտեսական շինություններից, որոնք շրջապատված են պարիսպներով և աշտարակներով: Կառույցների մեծ մասը քանդված է: Արևելյան մասում տեղակայված եկեղեցին համեմատաբար լավ է պահպանվել: Այն պատկանում է թաղածածկ միանավ բազիլիկների տիպին: Բոլոր տվյալները ցույց են տալիս, որ եկեղեցին կառուցվել էր XVIIդարում:
