ԱՀ Մարտունու շրջանի Հաղորտի համայնքում վեբ ծրագրավորման գրասենյակ է բացվել։
Հաղորտիում վեբ ծրագրավորման գրասենյակ է բացվել
ՍՏԵՓԱՆԱԿԵՐՏ, հուլիսի 24, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է գրասենյակի մենեջեր Շուշան Մարտիրոսյանը։
«2016 թ-ին գյուղի 12 տարեկանից բարձր երեխաներս սկսեցինք հաճախել Թումո ստեղծարար տեխնոլոգիաների կենտրոն։ Այստեղ մասնակցել ենք տարբեր դասընթացների և, հաղթահարելով փուլերը, անցել ենք աշխատարանի։ Այնուհետև 2019թ-ին «Ես» կրթական հիմնադրամը Հաղորտիում անցկացրեց դասընթաց, որից 4 ամիս անց ընտրեց 4 երիտասարդներիս, որոնց հետ անցկացրեց վեբ ծրագրավորում դասընթացներ։ Մենք այդ դասընթացները ավարտելուց հետո հասկացանք, որ որպեսզի մեր սովորած գիտելիքները մեզ արդյունք տան, անհրաժեշտ է աշխատանք, գրասենյակ, համակարգիչ և համացանց»,- նշել է Շ.Մարտիրոսյանը։
Մեր զրուցակցի տեղեկացմամբ՝ շենքային պայմանները ստեղծել են սեփական ուժերով. վերանորոգել, կահավորել ու գրասենյակի տեսք են հաղորդել։
«Արագ համացանցը ապահովել է «Ես» կրթական հիմնադրամը, համակարգիչները տրամադրել է «Ինստիգեյթ մոբայլ»֊ը, իսկ գրասենյակի համար նախատեսված սենյակը տրամադրել է համայնքի ղեկավարը»,- հավելել է նա։
Վեբ ծրագրավորման գրասենյակի աշխատողներն արդեն ունեն իրենց առաջին գործը։
«Այս պահի դրությամբ աշխատում ենք ԱՀ ԿԳՄՍ նախարարության պաշտոնական կայքէջի պատրաստման վրա. մոտ օրերս կավարտենք աշխատանքները»,- ընդգծել է մեր զրուցակիցը։
