Պատերազմից հետո թեև ԱՀ Հադրութի շրջանը մնաց թշնամու տիրապետության տակ, բայց Տողի արվեստի դպրոցը շարունակեց իր գործունեությունը Ստեփանակերտում:
Տողի արվեստի դպրոցը չունի նոր հասցե, բայց շարունակում է գործել
ՍՏԵՓԱՆԱԿԵՐՏ, 26 հուլիսի, ԱՐՑԱԽՊՐԵՍ: Դպրոցի տնօրեն Սուսաննա Բալայանը մեզ հետ զրույցում նշեց, որ իրենց աշակերտների մեծ մասը տեղափոխվել է Երևան և Հայաստանի տարբեր մարզեր, սակայն կան վերադարձողներ:
«240 աշակերտ ուներ դպրոցը։ Հիմա քիչ մասն է վերադարձել, բայց մենք շարունակում ենք մեր գործունեությունը, որովհետև գիտակցում ենք, որ հանձնվելու իրավունք չունենք։ Մեր հաշվետու համերգը ներկայացրել ենք Խնածախ, Այգեստան, Նախիջևանիկ, Առաջաձոր, Ծմակահող, Հաթերք գյուղերում, իսկ վերջինը Ստեփանակերտում էր։ Աշխատելն ու արդյունա ապահովելը դժվար է, որովհետև Տողի արվեստի դպրոց ներկայումս շենքային պայմաններ չունի. այն դասատուները, ովքեր աշխատում են նաև Ստեփանակերտի երաժշտական դպրոցում և Սայաթ-Նովայի անվան երաժշտական քոլեջում, մեր աշակերտների հետ պարապում են իրենց դասարաններում: Սայաթ Նովայի անվան երաժշտական քոլեջի տնօրենը իրենց դասացուցակն այնպես է կազմել է ՝ ելնելով հենց այդ հանգամանքից։ Դասատուները նաև առցանց պարապմունքներ են կազմակերպում։ Մենք հույս ունենք, որ, այնուամենայնիվ, շատերը կվերադառնան: Հենց այդ հույսով էլ շարունակում ենք մասնակցել մրցույթներին», - ասաց Ս. Բալայանը:
Մեր զրուցակցի խոսքով՝ ԱՀ ԿԳՄՍ նախարար Լուսինե Ղարախանյանը պատրաստակամություն է հայտնել օգնելու շենքային պայմաններ ունենալու հարցում: Սուսաննա Բալայանը նշեց, որ Տողի արվեստի դպրոցում 30 ուսուցիչ էին աշխատում. Արցախ են վերադարձել 23-ը:
«Սեպտեմբեր ամսից ուսուցիչների շարքը կհամալրեն մեր երբեմնի աշակերտները, ովքեր այս տարի ավարտել են երաժշտական քոլեջը: Բայց մեր դասատուների քանակը քիչ է, սեպտեմբեր ամսից մեզ անհրաժեշտ կլինեն նկարիչ և դասական պարի դասատու: Մեր դպրոցի սկզբունքներից մեկն այն է, որ ոչ միայն լավ մասնագետ պետք է մեզ միանա, այլ նաև լավ մարդ, ով երեխաների հետ ցանականա և կարողանա աշխատել: Պատերազմից հետո Ասկերանի շրջանի Խնածախ, Այգեստան, Նախիջևանիկ, Մարտակերտի շրջանի Առաջաձոր, Ծմակահող գյուղերում էինք աշխատել և կշարունակենք աշխատել: Իսկ Հաթերք գյուղից ստացանք հրավեր», -հավելեց տնօրենը:
Նշենք, որ Տողի արվեստի դպրոցը հիմնադրվել է 2005-2006 թվականներին, լրագրող և երաժիշտ Սուսաննա Բալայանի մտահղացմամբ և բազմաթիվ բարերաների աջակցությամբ ու ֆինանսավորմամբ։ Տողի արվեստի դպրոցում գործում են երաժշտական, ժողովրդական երգեցողության, գեղարվեստական, պարի, թատերական և կիրառական արվեստի բաժինները։
