Հայաստանի Հանրապետության Գյումրի քաղաքում տեղի ունեցած «Գյումրու գավաթ» կոչվող սպորտային պարերի մրցույթում Ստեփանակերտի «Գրիգոր Նարեկացի» համալսարանի ուսանողները, գրավելով մրցանակային տեղեր, Արցախ են բերել «Գյումրու գավաթը»:
Արցախցիները սպորտային պարերի մրցույթում մրցանակային տեղեր են զբաղեցրել
ՍՏԵՓԱՆԱԿԵՐՏ, 28 հուլիսի, ԱՐՑԱԽՊՐԵՍ: Բուհի «Էկոնոմիկա» բաժնի 3-րդ կուրսի ուսանողուհի Մարգարիտա Աղաջանյանը մրցույթում զբաղեցրել է առաջին մրցանակային տեղը:
«Մրցույթին ես հանդես եկա պրոֆեսիոնալ լատինաամերիկյան ոճով: Մեր պարերում կարևոր է տեխնիկայի և ֆիզիկական ընդունակությունների ճիշտ զարգացումը և, իհարկե, աշխատասիրությունը, որը ամենակարևոր հատկանիշներից մեկն է: Շատ եմ կարևորում նաև մարզիչի ճիշտ և գրագետ աշխատանքը: Իմ պարուսույց Էլեոնորա Հակոբյանի շնորհիվ եմ ձեռքբերումներ ունենում», - «Արցախպրես»-ի թղթակցի հետ զրույցում նշեց Մ. Աղաջանյանը:
Իսկ «մանկավարժություն» բաժնի 4-րդ կուրսի ուսանողուհի, երկրորդ մրցանակային տեղը զբաղեցրած Ալյոնա Չալյանը նշեց, որ հենց ցանկալի արդյունք ունենալու տրամադրությամբ են մասնակցել մրցույթին։
«Սպասումներն իրականացան։ Մենք բարձր պահեցինք Արցախի պատիվը։ Հաղթանակին հաջորդեց հպարտությունը և հավատը, որ խաղաղություն կլինի, և կշարունակենք մասնակցել նմանատիպ մրցույթների։ Իսկ մրցույթին պարել եմ սամբա, չա ֊չա ֊չա, ջայվ», - մեզ հետ զրույցում ասաց Ա. Չալյանը: