Մատենադարան-Գանձասար գիտամշակութային կենտրոնի թանգարանային մասը շարունակում է իր բնականոն գործունեությունը և նորից բաց է այցելուների համար:
Մատենադարան-Գանձասարի թանգարանը շարունակում է իր բնականոն գործունեությունը
ՍՏԵՓԱՆԱԿԵՐՏ, 28 հուլիսի, ԱՐՑԱԽՊՐԵՍ։ Այս մասին «Արցախպրես»-ի թղթակցին տեղեկացրեց Մատենադարան-Գանձասար գիտամշակութային կենտրոնի տնօրեն Արամ Թորոսյանը:
«Պատերազմի օրերին ձեռագրերը, հնատիպ գրքերն ու արխիվային փաստաթղթերը, ինչպես նաև համակարգիչներն ու տեխնիկական այլ միջոցներ, տարհանվել են ռազմական գործողությունների գոտուց, տեղափոխվել առավել ապահով վայր՝ Երևանի Մատենադարան: Այսինքն, մասնաճյուղը ոչ թե դադարեցրել է գործունեությունը, այլ իր դռները ժամանակավոր փակել է այցելուների առաջ: Այժմ ցուցադրության շուրջ 1/3-ը վերադարձրել ենք Գանձասար: Արդեն մի քանի օր է Մատենադարան-Գանձասար գիտամշակութային կենտրոնի թանգարանային մասը կրկին բաց է այցելուների համար», - նշեց Ա. Թորոսյանը:
Մեր զրուցակիցը հավելեց, որ Մատենադարան-Գանձասար գիտամշակութային կենտրոնում առկա է անգլերենի գերազանց իմացությամբ զբոսավարի թափուր հաստիք։
«Զբոսավարն աշխատելու է պայմանագրային հիմունքներով: Զբոսավարի թափուր հաստիքը զբաղեցնել ցանկացողներն իրենց կենսագրության, կրթության, աշխատանքային գործունեության վերաբերյալ տեղեկությունները կարող են ուղարկել Մատենադարան-Գանձասար գիտամշակութային կենտրոնի էլ. հասցեին՝ gandzasar@matenadaran.am», - ասաց Արամ Թորոսյանը:
