Պրոֆեսոր Գրիգորի Գաբրիելյանցի անվան «Ապագա սերունդներ» հիմնադրամի աջակցությամբ` երեխաների ամառային հանգստի կազմակերպման համար իրականացվում է «Ամառը միասին» ծրագիրը։
«Ապագա սերունդներ» հիմնադրամն առաջնագծամերձ համայնքներում մշակութաժամանցային ծրագիր է իրականացնում
ՍՏԵՓԱՆԱԿԵՐՏ, օգոստոսի 4, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասաց հիմնադրամի հանրային կապերի պատասխանատու Լուսինե Գասպարյանը:
«Այսօր ռազմավարական, առանցքային խնդիր է մատաղ սերնդի կրթական, հոգևոր֊մշակութային ճիշտ զարգացումը։Հիմնադրամի մի շարք ծրագրեր ծառայում են այդ նպատակին։ Հունիս ամսից հիմնադրամը մեկնարկել է «Ամառը միասին» մշակութաժամանցային ծրագիրը, որի նպատակն է Արցախի շրջկենտրոններում և համայնքներում հետաքրքիր դարձնել երեխաների առօրյան ամառային արձակուրդների ընթացքում։ Ծրագրում ներառված կրթամշակութային, հետաքրքրաշարժ և ժամանցային դասընթացները երեխաներին հնարավորություն են ընձեռում հետաքրքիր և հագեցած անցկացնել ամառային արձակուրդները, ձեռքբերել՝ նոր գիտելիքներ և հմտություններ»,- նշեց Լ. Գասպարյանը:
Մեր զրուցակցի տեղեկացմամբ՝ ծրագրի շրջանակներում հիմնադրամի ստեղծագործական խումբը նկարչության և ձեռարվեստի վարպետության և պատմության դասեր է վարել շրջկենտրոն Մարտակերտում, Մաղավուզ, Աստղաշեն,Սարուշեն, Խրամորթ գյուղերում։
«Մեր ամառային հետաքրքիր ու հաճելի հանդիպումների ընթացքում դպրոցականները շփվում են կերպարվեստի հետ, ծանոթանում՝ ժանրերին,նրանց մոտ ձևավորվում է ստեղծագործական ու ընկերական միջավայր, ինչ֊ որ չափով մեղմացնում՝ հետպատերազմյան շրջանի լարվածությունն ու դեպրեսիաները»,- ընդգծել է Լ. Գասպարյանը, և հավելել, որ ծրագիրը շարունակական բնույթ կկրի։
