ՍՏԵՓԱՆԱԿԵՐՏ, 5 օգոստոսի, ԱՐՑԱԽՊՐԵՍ։  Այս մասին «Արցախպրես»-ին հաղորդել են ԱՀ Ազգային ժողովի լրատվության և հանրության հետ կապերի բաժնից:

 

Օրակարգում 3 օրենքների նախագծերի քննարկման հարցերն էին:

 

ԱՀ աշխատանքի, սոցիալական և միգրացիայի հարցերի նախարարի տեղակալ Վ. Առաքելյանի տեղեկացմամբ՝ առաջիկայում, «Հայաստան» համահայկական հիմնադրամի միջոցների հաշվին տեղահանված անձանց համար նախատեսվող՝ մեծ թվով բնակելի տների, բնակարանների, ինչպես նաև սոցիալական ենթակառուցվածքների կառուցման աշխատանքներն ԱԱՀ-ից ազատելու գործընթացն առավել դյուրացված կազմակերպելու նպատակով, առաջարկվում է «Ավելացված արժեքի հարկի մասին օրենքում» փոփոխություն և լրացում կատարելու մասին» օրենքի նախագծով դրանք անմիջականորեն ազատել ԱԱՀ-ից՝ առանց բարեգործական հանձնաժողովի որակման:

 

Նախագծի ընդունմամբ՝ «Հայաստան» համահայկական հիմնադրամի միջոցների հաշվին ապրանքների մատակարարումը, աշխատանքների կատարումը և (կամ) ծառայությունների մատուցումը կազատվի ԱԱՀ-ից՝ Արցախի Հանրապետության կառավարության կողմից սահմանված կարգով:

 

«Ավելացված արժեքի հարկի մասին օրենքում» փոփոխություն և լրացում կատարելու մասին» օրենքի մեկ այլ փոփոխությամբ առաջարկվում է՝ կառավարության որոշմամբ սահմանել ավելացված արժեքի հարկի հաշվին հարկ վճարողի այլ հարկային պարտավորությունների դիմաց հաշվանցման և (կամ) վերադարձման ենթակա գումարի մեծության որոշման կարգ, որը կապահովի զրոյական դրույքաչափի կիրարկումը:

 

Օրենքի նախագծի ընդունման արդյունքում էականորեն կնվազեցվի ԱՀ տարածքից արտահանում իրականացնող կազմակերպությունների հարկային բեռը և, հետևաբար, դրական կանդրադառնա երկրից արտահանման ծավալների վրա:

 

ԱՀ կադաստրի և պետական գույքի կառավարման կոմիտեի նախագահ Ս.Գալստյանը ներկայացրել է «Պետական տուրքի մասին» օրենքում փոփոխություններ և լրացումներ կատարելու մասին» օրենքի նախագիծը, որի մշակումը պայմանավորված է հանրային լայն շրջանակների միջին եկամուտների և բնակելի տների կամ բնակարանների պետական գրանցման համար նախատեսված պետական տուրքի վճարների ընդունելի հարաբերակցություն ապահովելու, ինչպես նաև Արցախի Հանրապետությանը մի շարք ծառայությունների գծով պետական տուրք վճարելուց ազատելու անհրաժեշտությամբ:

 

Միաժամանակ, մինչև 2001 թվականի հունվարի 1-ը ձեռքբերված անշարժ գույքի նկատմամբ սեփականության (օգտագործման) իրավունքի պետական գրանցում կատարելու համար պետական տուրքի վճարումից սեփականատերերին ազատելը բխում է նշված անշարժ գույքերի նկատմամբ իրավունքների պետական գրանցման և դրանք իրավական և հարկային դաշտ բերելու գործընթացը խթանելու անհրաժեշտությունից:

 

 Նախագծով առաջարկվում է «Պետական տուրքի մասին» օրենքով նախատեսված որոշակի ծառայությունների գծով պետական տուրքի չափերի նվազեցում և պետական տուրքի վճարումից ազատում:

 

Նախագծերի հեղինակները պատասխանել են պատգամավորների բարձրացրած հարցերին:

 

Ներկայացված 3 օրինագծերն էլ արժանացել են հանձնաժողովի դրական եզրակացությանը և ընդգրկվել առաջիկա արտահերթ նիստի օրակարգում:

 

Նիստին ներկա էր ԱԺ նախագահ Արթուր Թովմասյանը: