«Բարձր տեխնոլոգիաների և ռազմավարական պլանավորման կենտրոն» հիմնադրամն ամփոփել է 2021 թվականի մայիս ամսից սկսած բիզնես և բարեգործական ծրագրերի դիմումների ընդունման առաջին փուլը։
Ամփոփվել է բիզնես և բարեգործական ծրագրերի դիմումների ընդունման առաջին փուլը
ՍՏԵՓԱՆԱԿԵՐՏ, 16 օգոստոսի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է Բարեգործական և ինվեստիցիոն ծրագրերի ռազմավարական պլանավորման բաժնի պետ Բելլա Սարգսյանը և նշել, որ առաջին փուլում զգալի էր արցախցիների հետաքրքրությունը Հիմնադրամի գործունեության նկատմամբ։
«Ամփոփելով առաջին փուլը՝ նշենք, որ մոտ 130 արցախցիներ հետաքրքրություն են ցուցաբերել ծրագրի նկատմամբ։ Ունենք 33 փաստացի ծրագիր, որոնք անցել են դիմումի ընդունման բոլոր փուլերով։ Ներկա պահի դրությամբ հաստատվել է 10 ծրագիր, որից 7-ը արդեն տեղադրվել է Հիմնադրամի օնլայն հարթակում, և ցանկացողները կարող են արդեն իրենց աջակցությունը տրամադրել նախընտրած ծրագրին։ Հաստատվածներից 1-ը հանդիսանում է պետական ծրագիր, որը կազմվել է ԱՀ Կառավարության, Քաղաքաշինության նախարարության և Հիմնադրամի համագործակցությամբ («Մոդուլ տուն» ծրագիր), 2-ը բարեգործական ծրագրեր են մշակույթի ոլորտից, 1-ը՝ հացի արտադրություն, որը հաց կմատակարարի Ասկերանի շրջանի երեք միմյանց հարակից գյուղերի, 1-ը՝ զբոսաշրջության ոլորտին պատկանող ծրագիր և 5-ը հանդիսանում են գյուղատնտեսության՝ մասնավորապես անասնապահության ոլորտը զարգացնող ծրագրեր։
Նկատելի է, որ մեր հայրենակիցները հիմնականում ցանկություն են հայտնում ներկայացնել ծրագրեր անասնապահության ոլորտից։ Կան ինչպես փորձ ունեցողներ, այնպես էլ սկսնակներ, որոնք հստակ պատկերացնում են տվյալ ոլորտի առանձնահատկությունները և գիտեն, թե ինչպես են ընդունելու իրենց առաջարկած բիզնես նախագծի մարտահրավերները», - հավելեց Բ. Սարգսյանը։ Մեր զրուցակցի տեղեկացմամբ՝ դիմումների ընդունման վերջնաժամկետը չի վերաբերում արտադրության և տեղեկատվական տեխնոլոգիաների ոլորտներին պատկանող ծրագրերին, որոնց համար դեռ շարունակվում է հայտերի ընդունումը։