Իսրայելի վարչապետ Նաֆթալի Բենեթը եւ նախագահ Ջո Բայդենը օգոստոսի 26-ին Սպիտակ տանը բանակցություններ կվարեն:
Իսրայելի վարչապետը մեկնում է Վաշինգտոն
ՍՏԵՓԱՆԱԿԵՐՏ, օգոստոսի 19, ԱՐՑԱԽՊՐԵՍ: Այս մասին հայտնել է Սպիտակ տան մամուլի քարտուղար Ջեն Փսակին, փոխանցում է news.am-ը:
«Վարչապետ Բենեթի այցը կամրապնդի Միացյալ Նահանգների եւ Իսրայելի միջեւ ամուր գործընկերությունը, կարտացոլի մեր կառավարությունների եւ ժողովուրդների միջեւ խորը կապերը եւ կընդգծի Իսրայելի անվտանգությանը Միացյալ Նահանգների նվիրվածությունը», - հայտարարել է Փսակին:
Նրա խոսքով՝ երկու առաջնորդները «կքննարկեն տարածաշրջանային եւ գլոբալ անվտանգության հետ կապված ամենակարեւոր խնդիրները, այդ թվում՝ Իրանը»: «Այցը երկու առաջնորդներին հնարավորություն կտա նաեւ քննարկել իսրայելցիների եւ պաղեստինցիների խաղաղության, անվտանգության եւ բարգավաճմանն ուղղված ջանքերը, ինչպես նաեւ տարածաշրջանի ավելի խաղաղ եւ անվտանգ ապագայի ուղղությամբ աշխատանքի կարեւորությունը», - հավելել է նա:
Իսրայելի վարչապետ Նաֆթալի Բենեթը ավելի վաղ հայտարարել էր, որ մտադիր է Բայդենի հետ քննարկել Իրանը: «Մենք նպատակաուղղված գործընկերության քաղաքականություն կիրականացնենք՝ ուղղված Իրանի ապակայունացնող, բացասական տարածաշրջանային գործունեության, մարդու իրավունքների ոտնահարման, ահաբեկչության սանձահարմանը», - հայտարարել է Բենեթը:
