Նախօրեին Ստեփանակերտում տեղի է ունեցել Անգելինա Առստամյանի «Անավարտ պատմություն» գրքի շնորհանդեսը։
Կայացել է «Անավարտ պատմություն» գրքի շնորհանդեսը
ՍՏԵՓԱՆԱԿԵՐՏ, 30 օգոստոսի, ԱՐՑԱԽՊՐԵՍ: Անգելինան արցախյան 44-օրյա պատերազմի անմահ հերոս Կարեն Բեգլարյանի այրին է։
Վիպակը պատմում է 44-օրյա պատերազմում զոհված Կարեն Բեգլարյանի և Անգելինա Առստամյանի անձնական ողբերգության, պատերազմի արհավիրքի ու հասարակ մարդկանց կյանքում նրա ավերիչ, սարսափազդու ներկայության մասին։ Սակայն «Անավարտ պատմություն»֊ը նաև սիրո և նվիրումի մասին է։ Մեծ սիրո, որ շարունակում է ապրել Կարենի և մյուս զոհվածների հիշատակը խնկարկողների հիշողության մեջ։
«Արցախպրես»-ի թղթակցի հետ զրույցում Անգելինան ասել է. «Կան պատմություններ, որոնք պետք է մնան միայն իմը ու Կարենինը: Ես հավատում եմ, որ մահը մարդու վերջը չէ, ես հավատում եմ, որ ինչ-որ տեղ նա կա, և իմ կյանքի ավարտից հետո մենք դեռ հանդիպելու ենք: Եթե այսօր ես ապրում եմ, ուրեմն առաքելություն ունեմ . և ապրում եմ՝ այդ առաքելությունը գտնելու նպատակով:
Ես չեմ կիսում մարդկանց հետ իմ վիշտն ու տխրությունը, ես նրանց հետ կիսում եմ միայն իմ ուրախությունը, երջանիկ ու հետաքրքիր պահերը:
Գրքի պատմությունը սկսվում է իմ ու Կարենի հանդիպումից և ավարտվում նրա անմահությամբ: Կարենին կորցնելուս մասին ես ոչ մի նախադասություն չեմ գրել: Ես գրքում ներկայացրել եմ ամենալուսավոր ու երջանիկ պահերից ընդհամենը փոքրիկ հատվածներ: Իմ կարծիքով՝ այս հողը լացով ջրելու հող չէ, և տղաների պատիվը պետք է բարձր պահել: Պետք է շարունակեմ Կարենի գործը։ Իմ ճակատագրին արժանացած բոլոր կանայք պետք է շարունակեն ապրել և ապրեցնել Արցախը, այն Արցախը, որն այսօր կա իրենց ամուսինների արյան շնորհիվ»,- նշեց Ա. Առստամյանը:
« Անգելինան տարիներ առաջ իմ ուսանողուհին էր՝ միշտ թախծոտ աչքերով։ Մի օր նրա աչքերի թախիծը փոխվել էր չարաճճի ու երջանիկ փայլի. նա գտել էր իր սերը՝ Կարենին։ Գրքում Անգելինան ներկայացրել է իրենց սիրո հավերժ ներկա պատմությունը։ Հերոսները չեն մահանում, նրանք իրենց սխրանքով անմահանում են՝ ճիշտ ապրելու, ճշմարիտ ուղուց չշեղվելու իրենց հրամայականով դառնալով մեզ ուղղորդողներ։ Հավերժ փառք ու պատիվ մեր անմահ հերոսներին, խոնարհումս՝ հերոսածին մայրերին, հերոսածին Ալինա Գաբրիելյանին: Արցախը ապրում է նաև այսպես՝ ցավը կրծքում սեղմած, արարելով»,- նշեց Զ. Սառաջյանը:
Միջոցառմանը ներկա էին Կարենի ու Անգելինայի հարազատները, ընկերները:
