Կիոկուշին կարատեի Հայաստանի հավաքականի մարզիկներն այս օրերին Արցախում անց են կացրել պարապմունքներ:
Կիոկուշին կարատեի Հայաստանի հավաքականն Արցախում մարզահավաք է անցկացրել
ՍՏԵՓԱՆԱԿԵՐՏ, 30 օգոստոսի, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է Աշխարհի և Եվրոպայի եռակի չեմպիոն, Արցախի հավաքականի գլխավոր մարզիչ Արթուր Առուշանյանը:
«Հայաստանի կիոկուշին կարատեի հավաքականն անց է կացնում մարզահավաք: Սա երրորդ փուլն է արդեն, իսկ մինչ այդ երկու փուլ անց ենք կացրել Երևանում և Սևանում: Երրորդ փուլի ավարտից հետո կմասնակցենք Եվրոպայի առաջնությանը, որը տեղի կունենա սեպտեմբերի 25-ին և 26-ին, Լեհաստանում: Մարզումներին Արցախից մասնակցում է 8 հոգի։ Սա մեծ հնարավորություն է մեր այն մարզիկների համար, ովքեր ընդգրկված չեն Հայաստանի հավաքականի կազմում, քանի որ նրանց հետ կմասնակցեն պարապմունքներին և մյուս մրցաշարերում արդեն կկարողանան առաջ գնալ»,- նշեց Ա. Առուշանյանը:
Հայաստանի կիոկուշին կարատեի մարզիչ Կարպիս Կարապետյանի խոսքով՝ այս մարզահավաքից ակնկալում են մարզիկների որակական պատրաստվածության բարձրացում:
«Մարզիկները շատ բարձր մակարդակով անցկացրին մարզահավաքը Սևանում և Երևանում:Եթե հաշվի առնենք , որ ամբողջ տարածաշրջանում և աշխարհում կիոկուշին կարատեի պատմության մեջ միայն Արցախից ունենք եռակի չեմպիոն, ապա կարող եմ ասել, որ հաղթանակ գրանցելու ակնկալիքները մեծ են։ Այսօր մարզիկներն իրենց պարապմունքներն անց են կացնում չեմպիոնի հետ, և դա արդեն շատ մեծ փորձի փոխանակում է: Թե՛ մարզիկները և թե՛ մարզիչները նրանից շատ բան ունեն սովորելու։ Սա մեծ հնարավորություն է մարզիկների համար, քանի որ նրանք ծանոթանում եմ միմյանց հետ, ծանոթանում են Արցախին ու Ստեփանակերտին»,- ընգծել է Կ. Կարապետյանը:
