Արցախում պատրաստվող «Բերդաշեն թեյ» անվամբ բուսական թեյն արտադրվում է 2021 թվականի օգոստոս ամսից։
Արցախյան բուսական թեյերի շարքում նոր արտադրատեսակ է ավելացել
ՍՏԵՓԱՆԱԿԵՐՏ, սեպտեմբերի 14, ԱՐՑԱԽՊՐԵՍ: «Արցախպրես»-ի թղթակցի հետ զրույցում «Թեյ Բերդաշեն»-ն արտադրող Էռնա Սողոմոնյանն ասել է, որ խոտաբույսերը հավաքում են Մարտունու շրջանի Բերդաշեն գյուղի սարերից և դաշտերից։
«Թեյի պատրաստման գաղափարը ծագել է հենց հարազատ Բերդաշենում։ Այնտեղից էլ հավաքեցի խոտաբույսերն ու սկսեցի նախապատրաստական աշխատանքները։ Թեյերը մոտ 10 խոտաբույսերի համադրություն են՝ ուրց, վայրի սուսամբար, դաղձ, անթառամ, լոռենի, երիցուկ, ծաղկած ալոճենի և սրոհունդ»,- նշեց Է. Սողոմոնյանը։
Նրա խոսքով՝ թեյերը պատրաստվում են սիրով և արտահայտում Արցախի բնության համն ու հոտը։
«Սկզբնական շրջանում խոտաբույսերը հավաքել ենք, լվացել ու չորացրել։ Համտեսելով բոլոր միքսերը՝ ընտրել ենք թեյի 3 հայկական անվանում՝ Մետաքսե, Գիսանե, Շահանե։ Հետագայում պլանավորում ենք մեծացնել մեր արտադրանքը և ավելացնել ևս մի քանի թեյատեսակ։ Թեյի տուփերը ևս ինքս եմ պատրաստում։ Սպառումը դեռ իրականացնում ենք օնլայն եղանակով։ Առաջին խմբաքանակը սպառվել է հաշված ժամերի ընթացքում, և մենք սկսել ենք 2֊րդ՝ ավելի մեծ խմբաքանակի պատրաստումը։ Թեյի մեկ տուփն արժե 990 դրամ, իսկ տարողությունը 30գրամ է»,-մասնավորապես ասել է մեր զրուցակիցը՝ նկատելով, որ արցախյան թեյերը մեծ պահանջարկ ունեն սպառողների շրջանում:
«Ամեն մեկս մեր չափով պետք է նպաստենք Արցախում հայկական արտադրանքի ստեղծմանը։ Հատկապես հետպատերազմյան այս ծանր ժամանակաշրջանում թե՛ արցախցին, թե՛ Արցախը պետք է ամուր ոտքի կանգնեն և աշխարհին ցույց տան մեր ուժը և կարողությունը»,-ընդգծել է նա։
