Այսօր՝ սեպտեմբերի 20-ին, ԱՀ Ազգային ժողովի, Կրթության, գիտության, մշակույթի և սպորտի նախարարության և ՀՀ ԳԱԱ նախաձեռնությամբ կազմակերպվել է միջազգային գիտաժողով՝ նվիրված Արցախի Հանրապետության և Հայաստանի երրորդ Հանրապետության հռչակման 30-ամյակին: Գիտաժողովի աշխատանքների մեկնարկը տրվել է ԱՀ ԱԺ նիստերի դահլիճից:
Կոտրված իրականության բեկորների մեկտեղումը՝ կորուսյալ հայրենիքը վերականգնելու միջոց. Ստեփանակերտում միջազգային գիտաժողով է կայացել
ՍՏԵՓԱՆԱԿԵՐՏ, 20 սեպտեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ գիտաժողովի լիագումար նիստին բացման խոսքով հանդես է եկել ԱՀ ԿԳՄՍ նախարար Լուսինե Ղարախանյանը՝ շեշտելով, որ, չնայած անսովոր պայմաններում ենք նշում Հայաստանի 3-րդ Հանրապետության և Արցախի Հանրապետության անկախության 30-ամյակը, այդուհանդերձ, անկախությունը եղել և լինելու է բացատրագիր ու պատգամ առ այն, որ մեր ինքնությունն անխոցելի է անկախության բարձրագույն արժեքի շնորհիվ:
«Անկախությունը մեր հոգևոր և գաղափարական ինքնակազմակերպվածությունն է, նրա բարձրագույն դրսևորումը: Պատմաժամանակագրական տարբեր փուլերում մեր պետականությունն անցել է տարբեր փորձություններ՝ Տիգրան Մեծից մինչև Արշակունիներ ու Հայաստանի առաջին Հանրապետություն: Այսօր էլ մենք շարունակում ենք ապրել մեր պետականության համար բախտորոշ օրեր, և ի մի ենք հավաքում մեր կոտրված իրականության բեկորները, որոնցով դեռևս չենք կարող վերականգնել մեր կորուսյալ հայրենիքը, որը չի կարող օտարվել:Մենք համոզված ենք, որ անկախությունը մեր հոգևոր, ինտելեկտուալ, բարոյական, գաղափարական, ուժային և բոլոր մնացած ռեսուրսների կենտրոնացումն ու մեկտեղումն է, դա մեր՝ մեկ ուղղությամբ նայելն է»,- ընդգծել է Լ. Ղարախանյանը:ԱՀ նախագահ Արայիկ Հարությունյանի ողջույնի խոսքը ներկայացրել է Նախագահի մամլո խոսնակ Լուսինե Ավանեսյանը: Երկրի ղեկավարը ողջույնի ուղերձում կարևորել է Արցախում հայ ժողովրդի պատմության 2 վճռորոշ և շրջադարձային իրադարձություններին՝ ՀՀ և ԱՀ հռչակմանը նվիրված միջազգային գիտաժողովի կազմակերպումն ու անցկացումը:
«30 տարի առաջ Հայաստանն ու Արցախը կատարեցին պատմական ընտրություն՝ հօգուտ ազատ , անկախ և ինքնիշխան պետության, հօգուտ մեր պապերի հողում խաղաղ ու հանգիստ ապրելու, արարելու, սեփական ճակատագիրն ինքնուրույն տնօրինելու մեր իրավունքի պաշտպանության: Գիտաժողովի ծրագրում ընդգրկված թեմաների բազմակողմանի արծարծումը, հուսով եմ, այս բարդ ռազմաքաղաքական պայմաններում օգնելու է մեզ իրավիճակը խորությամբ հասկանալու և արդյունավետ որոշումներ կայացնելու հարցում»,- ասված էր Նախագահի ուղերձում:ԱՀ ԱԺ նախագահ Արթուր Թովմասյանը ելույթի իր խոսքում արժևորել է Արցախի Հանրապետության և Հայաստանի Հանրապետության հռչակման 30֊ամյակին նվիրված միջազգային գիտաժողովի նախաձեռնումն ու կազմակերպումը:
«Մեր կյանքով ու կենսակերպով պետք է ամրագրենք ու սրբագրենք Անկախության հռչակագիրը և հրաժարվենք այն ավարտված համարելու մոլորությունից: Արցախի Հանրապետությունը, նրա ժողովուրդն ու համայն հայությունը ամեն օր պետք է բացեն անկախության հռչակագրի կենսահաստատման նոր էջ: 30-ամյա անկախ պետականության դասերի եզրահանգումը մեկն է՝ նոր իրողությունների պրիզմայի տակ Արցախ-Հայաստան-Սփյուռք միասնականության, ունեցած մարդկային ու նյութական ռեսուրսների մեկտեղում»,- նշել է Ա. Թովմասյանը:Գիտաժողովին օրհնության ու ողջույնի խոսքով հանդես է եկել Հայ առաքելական եկեղեցու Արցախի Թեմի առաջնորդ Վրթանես եպիսկոպոս Աբրահամյանը և համոզվունք հայտնել, որ անկախությանը նվիրված գիտաժողովը մտորելու, դասեր քաղելու, բացթողումները վեր հանելու, առաջ շարժվելու կամքն ավելի հզորացնելու համար լավագույն առիթ է:
Լիագումար նիստում զեկուցումներով հանդես են եկել ՀՀ ԳԱԱ պատմության ինստիտուտի տնօրեն, ակադեմիկոս Աշոտ Մելքումյանը, ԱՀ ԱԺ Արտաքին հարաբերությունների հանձնաժողովի նախագահ, պ.գ.դ., պրոֆեսոր Վահրամ Բալայանը, ՀՀ ԳԱԱ պատվավոր անդամ(Լոնդոն) Ռուբեն Գալչյանը, ՀՀ ԳԱԱ արևելագիտության ինստիտուտի պրոֆեսոր, պ.գ.դ. Ալեքսան Հակոբյանը:
