Այսօր՝ սեպտեմբերի 25-ին՝ Ս. Գևորգ Զորավարի տոնին, ՀԱԵ Արցախի թեմը կազմակերպել է ուխտագնացություն դեպի Ասկերանի շրջանի Աստղաշեն համայնքի Սուրբ Գևորգ եկեղեցի:
Կազմակերպվել է ուխտագնացություն դեպի Աստղաշենի Սուրբ Գևորգ եկեղեցի
ՍՏԵՓԱՆԱԿԵՐՏ, 25 սեպտեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ տոնի կապակցությամբ ուխտի պատարագ մատուցվեց եկեղեցում՝ ձեռամբ տեղի հոգևոր հովիվ Տեր Բենիամին քահանա Ծատուրյանի:
«Այսօր այն մեծանուն Սրբի օրն է, որի անունն է կրում այս եկեղեցին, և ով համարվում է տիեզերական Սուրբ: Սուրբ Գևորգը, նահատակություն ընդունելով, վկայեց Քրիստոսին, վկայեց իր ամենաթանկը՝ կյաքը տալով հանուն հավատքի, հրաժարվելով ամեն տեսակի պարգևներից: Նա, ինչպես նաև մյուս զորավոր սրբերը, օրինակ են դարձել հայոց աշխարհի համար՝ որպես պահապան և քաջարի սրբեր: Եղել են պատերազմների ընթացքում ճշմարտությունը ցույց տալու և սխրանքներ գործելու օրինակներ: Այսօր էլ մեր բանակի հայորդիները, իրենց կրծքերին պահելով քրիստոնյայի նշանը՝ խաչը, մյուս ձեռքին՝ զենքը, պայքարում են երևացող և աներևույթ թշնամիների դեմ: Պայքարում են և մեզ հնարավորություն տալիս ուխտի պատարագ մատուցելու, աղոթելու մեր երկնային հորը մեր հոգիների, մեր քաջարի զինվորների, մեր բանակի, մեր ուխտերը վերստին հաստատելու համար», - ասաց Տեր Բենիամին քահանա Ծատուրյանը:
Ուխտագնացության մասնակից Անահիտ Դանիելյանը մեզ հետ զրույցում նշեց, որ նման նախաձեռնությունները թողնում են իրենց դրական ազդեցությունը մասնակիցների մտածելակերպի և աշխարհայացքի վրա և պահպանում են մարդ-Աստված կապը:
Պատարագի ավարտից հետո կազմակերպվեց հոգևոր-մշակութային միջոցառում, այնուհետև քահանայի կողմից օրհնված մատաղը բաժանվեց ուխտագնացության մասնակիցներին:
