2004 թվականից սկսած՝ հոկտեմբերի 7-ը նշվում է որպես Գրադարանավարի օր, որի խորհուրդը գրքի ու գրադարանի դերի արժևորումն է առողջ հասարակության ձևավորման գործում:
Հոկտեմբերի 7֊ը Գրադարանավարի օրն է. անդրադարձ(լուսանկարներ)
ՍՏԵՓԱՆԱԿԵՐՏ, 7 հոկտեմեբրի, ԱՐՑԱԽՊՐԵՍ: Օրվա առթիվ «Արցախպրես»-ի թղթակիցը զրուցել է Ստեփանակերտում գործող մի շարք գրադարանների տնօրենների հետ՝ պարզելու, թե հատկապես հետպատերազմական շրջանում ինչպիսին է Արցախի ընթերցողը և ինչ գրքեր է նախընտրում կարդալ։
Արցախի պետական համալսարանի գրադարանի տնօրեն Հասմիկ Հարությունյանի խոսքով՝ գրքերը մարդկային հիշողություններ են, սերունդներն իրար կապող օղակ, հոգևոր լույսի ջահակիրներ: «Մեր գրադարանը համալրված է անհրաժեշտ գրականությամբ, որպեսզի բուհի ցանկացած մասնագիտության ուսանող կարողանա ստանալ իրեն անհրաժեշտ տեղեկությունները և ամրապնդի իր գիտելիքները:
Պետք է նշեմ, որ ուսանողները նաև հետպատերազմական շրջանում են մեծ ոգևորությամբ հաճախում գրադարան և օգտվում առկա գրականությունից:
Գրադարանից օգտվողների շրջանում հատկապես մեծ թիվ են կազմում Բանասիրական, Տնտեսագիտական և Իրավաբանական ֆակուլտետների ուսանողները:
Նրանք նախընտրում են գիրքը, ոչ թե գրականության էլեկտրոնային տարբերակը, ինչն ուրախալի է: Վերջերս գրադարանի ֆոնդը, ըստ մասնագիտությունների, համալրվել է ահրաժեշտ գրականությամբ: Բացի մասնագիտական գրքերից, նկատելի է դասական և արտասահմանյան գրականությամբ հետաքրքրվածություն»,- նշել է Հ. Հարությունյանը:
