Վերջին շրջանում կորոնովիրուսային հիվանդությամբ վարակվածությունն Արցախում նոր թափ է ստացել: Դրա հետ մեկտեղ, հատկապես երեխաների շրջանում, աճել է վերին շնչուղիների վարակի տարածումը:
Երեխաների շրջանում կորոնավիրուսով վարակման դեպքեր կան, տարածվել են նաև սուր շնչառական վարակները. Մասնագետը՝ համաճարակաբանական վիճակի մասին
ՍՏԵՓԱՆԱԿԵՐՏ, 14 հոկտեմեբրի, ԱՐՑԱԽՊՐԵՍ: Հիվանդության հետագա տարածման դեմ կանխարգելիչ միջոցառումների ձեռնարկման մասին «Արցախպրես»-ի թղթակիցը զրուցել է Արցախի Հանրապետության առողջապահության նախարարության «Արևիկ» մանկական բուժմիավորման համաճարակաբան Արմինե Ասրյանի հետ:
«Երեխաների շրջանում կորոնավիրուսային հիվանդությամբ վարակվածության երկու դեպք է հաստատվել:
Զուգահեռ՝ ունենք սեզոնային վիրուսային վարակների աճ: Համեմատելով նախորդ տարվա նույն ժամանակահատվածի ցուցանիշների հետ՝ վերին շնչուղիների սուր վարակի դեպքերի թիվն ավելացել է՝ պայմանավորված օդի ջերմաստիճանի կտրուկ անկման հանգամանքով»,- նշել է մասնագետը:
Խոսելով ուսումնական հաստատություններում և մանկապարտեզներում տարվող հակահամաճարակային միջոցառումների մասին՝ մեր զրուցակիցն ընդգծեց, որ հիմնականում ուշադրություն պետք է դարձվի սենյակների հաճախակի օդափոխությանը։ «Վարակի տարածման ամենանպաստավոր պայմանը չօդափոխվող սենյակն է:
Եթե սենյակում առկա է բարձր ջերմաստիճան, սակայն այն անհրաժեշտ ձևով օդափոխված չէ, ապա հնարավոր չէ խուսափել վարակի տարածումից:
Օդի +18 ...+22 աստիճանը համարվում է օպտիմալ ջերմաստիճան, իսկ խոնավությունը սենյակներում պետք է լինի 40-60%»,- ներկայացրեց համաճարակաբանը:
Ըստ մասնագետի՝ վերին շնչուղիների վարակի առկայության դեպքում՝ չպետք է երեխային ստիպել պահանջվածից ավելի սնունդ ընդունել, փոխարենը վերջինս պետք է անսահմանափակ քանակությամբ հեղուկներ օգտագործի։