«Դասավանդի՛ր, Հայաստան» ծրագրի շրջանակներում աշխարհագրության ուսուցչուհի Տաթևիկ Ենոքյանը ՀՀ Արարատի մարզի Դարակերտ համայնքից գործուղվել է Արցախ և դասավանդում է ԱՀ Մարտակերտի շրջանի Ճանկաթաղ համայնքի միջնակարգ դպրոցում:
Ուժեղ պետություն ստեղծելով միայն կարող ենք պահպանել մեր գոյությունն ու ինքնությունը. «Դասավանդի՛ր, Հայաստան»-ի՝ Ճանկաթաղ գործուղված ուսուցչուհի(լուսանկարներ)
ՍՏԵՓԱՆԱԿԵՐՏ, 21 հոկտեմեբրի, ԱՐՑԱԽՊՐԵՍ:Տաթևիկ Ենոքյանը «Արցախպրես»-ի թղթակցի հետ զրույցում նշեց, որ ձգտում է համայնքային կյանքն ավելի ակտիվ դարձնել և երեխաների միջոցով իրականացնել համայնքային զարգացում` անկախ գյուղի սահմանապահ լինելու հանգամանքից։
Ուսուցչի խոսքով՝ օգտագործում են դասավանդման ինքնուրույն ուսումնառության մոդել, որի շրջանակում աշակերտները ոչ միայն յուրացնում են թեմատիկ նյութը, այլև իրականացնում ուսումնասիրություններ, փորձում են գտնել կիրառման տարբերակներ:
«Չնայած մենք ձգտում ենք բարձրացնել աշակերտների ակադեմիական գիտելիքների մակարդակը, բայց «Դասավանդի՛ր, Հայաստան» ծրագրի շրջանակում նաև իրականացնում ենք նախագծային ուսուցում՝ օգտագործելով դասավանդման միջդիսցիպլինար մեթոդը, որը դպրոցական մեթոդական համակարգում լայն տարածում չունի:
Նախագիծ կազմելու ընթացքում կիրառում ենք ինչպես մի առարկայի, այնպես էլ հարակից այլ առարկաների մասնագիտական գիտելիքները, որոնք առնչվում են հիմնախնդրին կամ այն հնարավորությանը, որն ընտրում ենք:
Նաև հետազոտություններ ենք իրականացնում հասարակական կազմակերպությունների, տեղական կառավարման օբյեկտների, փորձագետների և այլ մասնագետների շրջանակում: Այսինքն մի հարցը դիտարկում ենք տարբեր ասպեկտներով», - նշեց Տ.Ենոքյանը:
Տաթևիկ Ենոքյանի համոզմամբ՝ Արցախի ապագան կարելի է պատկերացնել միայն զգոն ու պատրաստված լինելով, թշնամուն լավ ճանաչելով:
«Արցախն ինձ համար իմ հայրենիքի մի անկյունն է, որն այս պահին վիրավոր է, և յուրաքանչյուրիս սիրո և ջերմության կարիքն ունի: Հայրենիքը, մարդուն, երևույթը չեն սիրում միայն վերացական գաղափարներով ու մտքերով, հեռվից, սիրում են այն շոշափելով, նրա համար մի բան անելով, գործելով, ճանաչելով, իր հետ միասին ապրելով, ստեղծելով ու իրար փոխադարձ հզորացնելով, վիրակապ դնելով ու այն խնամելով: Ցանկացած խնդիր կարելի է լուծել առաջին հերթին կրթության միջոցով, որովհետև մեր ապագա հասարակությունն այն երեխաներն են, որոնց մենք կրթում ենք, նրանք են հզորացնելու ու ամրացնելու այն երկիրը, որտեղ ապրում ենք:
Արցախը հզորանալու կարիք ունի, մենք թշնամու քթի տակ ուժեղ պետություն ստեղծելով միայն կարող ենք պահպանել մեր գոյությունը, ինքնությունը, իսկ այն ստեղծելու համար մեզանից յուրաքանչյուրի լուման ու ներդրումը շատ կարևոր է», - հավելեց ուսուցչուհին:
