Հայաստանի արտաքին գործերի նախարարի տեղակալ Վահե Գևորգյանը կարևորում է Արցախյան հակամարտության խաղաղ գործընթացի վերսկսումը:
ՀՀ-ի ջանքերն ուղղված են Արցախյան հակամարտության խաղաղ գործընթացի վերսկսմանը հասնելուն
ՍՏԵՓԱՆԱԿԵՐՏ, նոյեմբերի 4, ԱՐՑԱԽՊՐԵՍ-ԱՐՄԵՆՊՐԵՍ։ Վահե Գևորգյանն այս մասին ասաց խորհրդարանում լրագրողների հետ զրույցում:
«Գոյություն ունի Արցախյան հակամարտության խաղաղ գործընթացի վերսկսման անհրաժեշտություն: Եվ մեր ջանքերը նախևառաջ ուղղված են այդ նպատակին հասնելուն: Մնացած բոլոր խնդիրները, այդ թվում՝ Արցախի կարգավիճակի խնդիրը, քննարկվելու են խաղաղ գործընթացի շրջանակներում: Դրա համար այս հանգրվանում մեզ համար անհրաժեշտ է խաղաղ գործընթացի վերսկսումը ԵԱՀԿ Մինսկի խմբի համանախագահության շրջանակներում»,-ասաց Գևորգյանը:
Անդրադառնալով հարցին, թե Հայաստանի համար ո՞ր քարտեզներն են շահեկան, որպեսզի բանակցությունների ժամանակ պնդի առաջնորդվել դրանցով՝ փոխնախարարը վաղաժամ համարեց հարցը՝ հավելելով, որ այդ մասին խոսելու համար պետք է լինեն դելիմիտացիայի բանակցություններ: «Քանի դեռ չկան դելիմիտիացիայի բանակցություններ, խոսել, թե ինչ քարտեզներով, ինչ փաստաթղթերով ենք առաջնորդվում, խիստ վաղաժամ է: Երբ լինեն բանակցություններ, մենք այդ հարցերին կանդրադառնանք»,-ասաց Գևորգյանը:
Նա նշեց՝ իրենք ընդհանուր մոտեցումներ ձևավորում են ներքին քննարկումների ընթացքում, բայց, երբ բանակցություններ չկան, գործիքակազմի վերաբերյալ խոսելը վաղ է:
