«Շտապիր օգնության» բարեգործական հիմնադրամը Արցախյան 44-օրյա պատերազմի օրերին իր աջակցությունն է ցուցաբերել արցախցի բազմաթիվ ընտանիքների և այսօր շարունակում է իր գործունեությունն իրականացնել Հանրապետության մի շարք համայնքներում:
«Շտապիր օգնության» բարեգործական հիմնադրամը շարունակում է ծրագրերն Արցախում. գործունեության մասին պատմում է ներկայացուցիչը
ՍՏԵՓԱՆԱԿԵՐՏ, 5 նոյեմբերի, ԱՐՑԱԽՊՐԵՍ։ «Արցախպրես»-ի թղթակիցը հանդիպել և զրուցել է «Շտապիր օգնության» բարեգործական հիմնադրամի խորհրդի անդամ Անի Մարտիրոսյանի հետ, ով ներկայացրել է հիմնադրամի կողմից Արցախում իրականացված և իրականացվելիք գործունեության մասին:
Մեզ հետ զրույցում Ա. Մարտիրոսյանն ասել է, որ հիմնադրամը ստեղծվել է 2011 թվականին: Ի սկզբանե բաղկացած է եղել կամավորներից, այնուհետև վերափոխվել է իրավաբանական կառույցի: Եվ արդեն եկար տարիներ ի վեր գործում է՝ որպես կայուն կազմակերպություն:
«Պատերազմի հենց առաջին օրը մեր կազմակերպության նախագահ Ելենա Հակոբյանը գտնվում էր Հայաստանում, և անմիջապես, կամավոր հիմունքներով, շտաբ է բացել, որպեսզի օգնություն տրամադրենք արցախցիներին: Բաժանում էինք սնունդ, հիգիենայի և բժշկական պարագաներ, տաքացուցիչներ, վերմակներ, միայն 120 տ. հագուստ, 400 հատ մահճակալ, ինչպես նաև բազմաֆունկցիոնալ անկողիններ, որոնք անհրաժեշտ էին մեր վիրավոր տղաներին: Սեպտեմբերի 27-ից մինչև դեկտեմբերի կեսերը մոտ 40 000 բնակչի օգնություն է ցուցաբերվել: Այնուհետև 2021թ. մարտ ամսին իրականացրել ենք ակցիա, որի արդյունքում 25 տ. օգնություն ենք բերել Արցախ: Օգոստոս ամսին ԱՀ Մարտունու շրջանի Մաճկալաշեն համայնքի դպրոցականների համար բերել ենք գրենական պիտույքներ։ Լոգիստիկ փոխադրումն իրականացվում է ռուսական խաղաղապահ զորակազմի հումանիտար արձագանքման կենտրոնի աջակցությամբ: «Դոկտոր Լիզա» բարեգործական հիմնադրամն արդեն չորրորդ անգամն է՝ մարդասիրական օգնություն է ցուցաբերում Արցախի տեղահանված բնակիչներին, որոնք հաստատվել են ինչպես Հայաստանում, այնպես էլ Արցախի համայնքներում։ Այս անգամ հիմնադրամը՝ ի դեմս Նատալիա Ավիլովայի, Ստեփանակերտի Քերոլայն Քոքսի անվան վերականգնողական կենտրոնին ուղարկեց մեծահասակների և երեխաների խնամքի համար նախատեսված պարագաներ, մանկապարտեզների համար նախատեսված բժշկական և կենցաղային իրեր: Ընթացիկ տարվա մարտին մեր հերթական օգնության հետ մեկտեղ «Ռուսական հումանիտար առաքելություն» հասարակական կազմակերպությունը ևս մարդասիրական օգնություն ցուցաբերեց Արցախին։ Հասցեատերը Ստեփանակերտի Գրիբոյեդովի անվան համար 3 ռուսական դպրոցն էր, որտեղ կայացած հանդիպման ժամանակ կազմակերպության ներկայացուցիչը խոստացել է գեղարվեստական գրականություն ուղարկել դպրոցի համար, որպեսզի երեխաները կարողանան օգտվել ուսումնական նյութից՝ ծանոթանալով նաև ռուս դասականների ստեղծագործություններին։ «Ռուսական հումանիտար առաքելություն»֊ը կատարել է իր խոստումը. գրականությունը կնվիրաբերվի Ստեփանակերտի Գրիբոյեդովի անվան թիվ 3 ռուսական թեքմամբ դպրոցին»,- ներկայացրել է մեր զրուցակիցը:
Նրա խոսքով հանդիպում են ունեցել ԱՀ ԿԳՄՍ նախարար Լուսինե Ղարախանյանի հետ, ով ներկայացրել է Հանրապետությունում գործող այն մանկապարտեզների ցանկը, որոնց անհրաժեշտ է օգնություն տրամադրել:
«Առաջիկայում նախատեսում ենք Ռուսաստանի խաղաղապահ զորակազմի մարդասիրական արձագանքման կենտրոնի և «Մերսի» բարեգործական կազմակերպությունների ասոցիացիայի նյութատեխնիկական աջակցությամբ Ստեփանակերտի համար 1, Ասկերանի, Մարտունու և Մարտակերտի շրջանների մի շարք մանկապարտեզների տրամադրել կահույք, լվացքի մեքենաներ, խաղալիքներ և այն ամենը, ինչ անհրաժեշտ է մանկապարտեզներին: Մենք այդ ամենը գնում ենք Հայաստանից, որպեսզի նպաստենք նաև տնտեսությանը»,- նշել է Ա. Մարտիրոսյանը:
Մեր զրուցակիցը շնորհակալություն է հայտնել այն անձանց, ովքեր նպաստել են իրենց գործունեության անխափան իրականացմանը:
«Այս ամբողջ ժամանակահատվածում մեզ օգնում ու առաջնորդում է Հայաստանում Արցախի ներկայացուցիչ Սերգեյ Ղազարյանը, ում հետ մինչ օրս համագործակցում ենք, ԱՀ ԿԳՄՍ նախարար Լուսինե Ղարախանյանն էլ ուղղորդում է կրթության ոլորտին օգնելու հարցում՝ սկսած մանկապարտեզներից, մինչև ավելի բարձր օղակներ»,- ընդգծել է նա: