ՍՏԵՓԱՆԱԿԵՐՏ, նոյեմբերի 8, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասաց Այգեստանի համայնքապետ Մհեր Վանեսյանը: Խոսելով համայնքի անվան ծագման մասին՝ նա տեղեկացրեց, որ գյուղի պատմությունը սկսվում է 17-րդ դարից:

Բնակավայրը սկզբնական շրջանում կոչվել է «Բագլուջա», որը նշանակել է Աստծուն լսելի: Գյուղն «Այգեստան» է վերանվանվել անկախության շրջանում։ «Համայնքում 58 տեղահանված ընտանիք է հաստատվել՝ 214 բնակչով:

Բոլորն օգտվել են ԿԽՄԿ-ի կողմից տեղահանվածներին տրամադրվող աջակցությունից: Համայնքում գործում են համայնքապետարան, բուժկետ, ակումբ, որոնց շենքերը գտնվում են վթարային վիճակում: Հանդիսությունների սրահը վերանորոգման կարիք ունի: Դպրոցում սովորում է 201 աշակերտ, իսկ մանկապարտեզ հաճախում է 55 սան:

Գյուղամիջյան ճանապարհները ևս պետք է բարեկարգվեն: Արցախյան 44-օրյա պատերազմի հետևանքով վնասվել են գյուղի գրեթե բոլոր տները, որոնք պետական և անհատական միջոցներով վերանորոգվում են:

Գյուղում գործում է Սուրբ Աստվածածին եկեղեցին»,-ներկայացրել է համայնքապետը:

Մեր զրուցակիցը ցավով տեղեկացրեց, որ 44-օրյա պատերազմում հանուն հայրենիքի պաշտպանության 6 համագյուղացի է զոհվել, 14-էլ՝ վիրավորվել:Անդրադառնալով բնակիչների զբաղվածությանը՝ համայնքապետը նշեց, որ նրանք հիմնականում զբաղվում են անասնապահությամբ և հողագործությամբ։ Աշխատում են նաև պետական համակարգում։ «Գյուղում երիտասարդները շատ են, նրանք հավատով ապրում, արարում ու շենացնում են գյուղը»,- ընդգծել է համայնքի ղեկավարը: