«Վարդենի» արցախյան բրենդի հիմնադիր Վարդիկ Սարգսյանը ի սկզբանե որոշել էր, որ բրենդի անվանումը պետք է լինի հայկական։ Եվ այն համադրեց իր անվան հետ:
«Վարդենի»-ն հայրենի դրախտավայրի ծաղիկների միջոցով ի ցույց է դնում արցախյանը. հիմնադիր
ՍՏԵՓԱՆԱԿԵՐՏ, նոյեմբերի 11, ԱՐՑԱԽՊՐԵՍ։ «Արցախպրես»-ի թղթակցի հետ զրույցում Վարդիկը պատմեց, որ պարտադրված պատերազմը նրան ստիպեց իրագործել վաղուց ունեցած գաղափարները։
«Հասկացա, որ եկել է արցախյանը ներկայացնելու իմ հերթը, և հայրենի դրախտավայրի ծաղիկների միջոցով ի ցույց դրեցի արցախյանը։ Այս ամբողջ ընթացքում իմ կողքին են եղել ընտանիքս, ընկերներս և իմ բարին կամեցող մարդիկ. պատերազմից հետո «Արցախյան ծաղկաթեյ և արցախյան բարիքներ»-ի անձնակազմը ինձ տրամադրեց Դիզակ աշխարհից փնջած անմոռուկները, որոնք ևս իմ ձեռագործ աշխատանքների անզուգական մասը դարձան», - ասում է Վարդիկը։
«Գործը սկսելուց առաջ ուսումնասիրեցի շուկան։ Նկատելի է, որ պատերազմից հետո մարդիկ նախապատվությունը տալիս են հայկական արտադրանքին։ Մեր տեսականին գնալով ընդլայնվում է։ Հիմնականում զարդեր՝ վզնոցներ, թևնոցներ, ականջօղեր, բրոշներ և այլ պարագաներ եմ պատրաստում։ Բայց եղածով չեմ սահմանափակվում. «Վարդենի»-ն ունի նոր արտադրանք՝ էպոքսիդային խեժով պատրաստված պայուսակներ և սպասք, ինչը նորույթ է արցախյան շուկայում», - նշեց նա և հավելեց, որ տեսականին ներկայացված է օնլայն հարթակում, իսկ վաճառքն իրականացվում է փոստով կամ առձեռն եղանակով։ Ունեն հաճախորդներ ոչ միայն Արցախից և ՀՀ-ից, այլև արտերկրից։
