ԱՀ Ասկերանի շրջանի Փառուխ համայնքը Արցախի հնագույն բնակավայրերից է։ Գյուղի պատմությունը սկսվում է 9֊րդ դարից։
Փառուխի ազատ բնակֆոնդը սիրով կտրամադրենք մեր տեղահանված հայրենակիցներին. համայնքապետ
ՍՏԵՓԱՆԱԿԵՐՏ, նոյեմբերի 12, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է Փառուխի համայնքապետ Վարդան Միքայելյանը:
«Ազատ բնակֆոնդից մեծ սիրով բնակարաններ կտրամադրենք տեղահանված մեր հայրենակիցներին։ Համոզված եմ՝ նրանք նոր շունչ հաղորդեն մեր գյուղին: Համայնքապետարանի շենքը վթարային է, բուժկետը՝ նույնպես: Գյուղամիջյան ճանապարհները գտնվում են բարեկարգ վիճակում: Մոտ մեկ տարի է՝ դպրոցը չի գործում. համայնքում դպրոցահասակ երեխաներ չկան»,- պատմել է համայնքի ղեկավարը:
Մեր զրուցակիցը նշել է, որ երբեմնի աշխույժ գյուղն այսօր աշխատող ձեռքի կարիք է զգում։
«Մեր բնությունը շատ գեղեցիկ է։ Մրգատու ծառերն էլ կքած են բերքի ծանրությունից։ Պատերազմից հետո 60 հա գյուղատնտեսական նշանակության հողատարածք է մնացել թշնամու տիրապետության տակ, բայց մարդիկ չեն ընկրկում: Գյուղի աշխարհագրական դիրքը նպաստավոր է նաև անասնապահությամբ զբաղվելու համար. այսօր գյուղում ապրող մարդիկ զարգացնում են գյուղատնտեսության հենց այդ ճյուղը»,- ընդգծել է Վ. Միքայելյանը: