Մարտակերտի շրջանի Վաղուհաս համայնքի բնակիչները պատերազմից հետո շարունակում են հայրենիքում կերտել իրենց ապագան՝ փորձելով ուղիներ որոնել առկա խնդիրների լուծման համար:
«Կարդա ու խաղա Վաղուհասում». համայնքի զարգացման համար ծրագրեր են մեկնարկել
ՍՏԵՓԱՆԱԿԵՐՏ, նոյեմբերի 16, ԱՐՑԱԽՊՐԵՍ: Ներհամայնքային կյանքի զարգացմանն են միտված գրադարանի վերաբացման ու խաղահրապարակի կառուցման ծրագրերը։
«Արցախպրես»-ի թղթակիցը նախատեսվող աշխատանքների մասին զրուցել է «Կարդա ու խաղա Վաղուհասում» նախագծի հեղինակ, Վաղուհասի դպրոցի ուսուցչուհի Նարա Բալայանի հետ:
«Նախագծի ու ծրագրի մեկնարկը տրվել է նոյեմբերի 9-ից: Այս ծրագրի հիմնական նպատակն է վաղ տարիքից ընթերցանության խրախուսումը, կրթությանը և քաղաքացիների սոցիալական հաղորդակցմանը նպաստելը, որի արդյունքում կունենաք կրթված, խելացի, հասուն, գրքասեր ժամանակակից հասարակություն, ստեղծված մտավոր ժամանցի կենտրոն և ընթերցողների համար առավել հարմարավետ միջավայր: Համայնքային գրադարանները պետք է հիմնադրված լինեն տեղական ինքնակառավարման մարմինների կողմից, սակայն քանի որ համայնքում չկա գրադարան, մենք, տեղական ինքնակառավարման մարմիններից թույլտվություն վերցնելով, որոշեցինք մեր ստեղծած գրադարանը կոչել համայնքային գրադարան: Աշխարհն արագորեն փոփոխվում է, և մատաղ սերնդին շահագրգռելու համար կարևոր է նաև ընթերցանության համար ընտրված միջավայրը։ Մեթոդներից մեկն էլ մենք որոշեցինք ընտրել համայնքային ընթերցանությունը, որն իր շուրջ կհամախմբի սովորողներին»,- ներկայացրել է Ն. Բալայանը:
Մեր զրուցակցի հավաստմամբ՝ ծրագիրն անհրաժեշտ է, քանի որ գրադարանն ապահովում է գրավոր ժառանգության երկարաժամկետ պահպանություն և մատչելիություն:
Ըստ նրա` համայնքի 700 բնակիչներից 650-ը գրադարանի պոտենցիալ այցելուներն են։ Ն. Բալայանի խոսքով՝ երբ դպրոցի աշակերտներն ուսումնասիրում էին համայնքի հնարավորությունները, նկատեցին, որ գյուղի ակումբին կից շինությունը որևէ նպատակի չի ծառայում: Եվ մտածեցին, որ կարող են այդ շինությունը վերանորոգել և օգտագործել` որպես գրադարան: Համայնքի ղեկավարին դիմելու և իրենց նախագիծը ներկայացնելու արդյունքում ստացան շինությունն օգտագործելու իրավունք։
«Համայնքային գրադարան ունենալու համար կարևոր խնդիրներից մեկը դարձավ գրքեր ձեռք բերելը։ Եվ որոշեցինք գրքահավաք կազմակերպել: Անհրաժեշտ է գրադարանի համար հավաքագրել գեղարվեստական, մանկական, պատկերազարդ, տեղեկատվական գրքեր կամ ձեռնարկներ բառարաններ, հանրագիտարաններ, պատմավեպեր, արտասահմանյան հեղինակների ստեղծագործություններ(հայերեն, ռուսերեն, անգլերեն լեզուներով) և այլն: Արդեն 700-ից ավելի գրքեր ունենք հավաքած: Ամեն օր տարբեր մարդկանցից զանգեր, նամակներ ենք ստանում. նրանք ցանկանում են գրքեր նվիրել: Ակնկալում ենք, որ մեզ կօգնեն, որպեսզի հնարավորինս արագ կարողանանք տարբեր հարթակներում տարածել և ներկայացնել, որ գյուղում գրադարան ունենալու համար նախաձեռնել ենք գրքահավաք: Ակնկալում ենք բարի մարդկանց պատրաստակամությունն ու աջակցությունը»,- մանրամասնել է մեր զրուցակիցը և հույս հայտնել, որ ժամանակակից գրողները նույնպես կցանկանան իրենց գրքերից նվիրել Վաղուհասի համայնքային գրադարանին:
Նախաձեռնության իրականացման համար վաղուհասցիները նաև դրամահավաք են կազմակերպել։
Ըստ նախաձեռնող խմբի կատարած հաշվարկների` եթե 4000 մարդ միանա ծրագրին և յուրաքանչյուրը նվիրաբերի 2000-ական դրամ, ապա այն կյանքի կկոչվի։ Ծրագիրը ներկայացված է reArmenia հարթակում: Ցանկացողները նախագծին կարող են ծանոթանալ հղմամբ «Գրքարշավին» կարող են միանալ հղմամբ։ Շարունակվող դրամահավաքին մասնակցել ցանկացողները կարող են անցնել reArmenia-ի համագործակցության և դրամահավաքի հարթակ ։ Իսկ «Կարդա ու խաղա Վաղուհասում» նախագծի և «Գրքարշավ» նախաձեռնության ընթացքին կարող եք հետևել ֆեյսբուքյան հետևյալ էջում:
