«Դասավանդի՛ր, Հայաստան» ծրագրի շրջանակներում ՀՀ Արարատի մարզի Այգեզարդ համայնքից գործուղված ու ԱՀ Մարտակերտի շրջանի Վերին Հոռաթաղ համայնքի Քերոլայն Քոքսի անվան միջնակարգ դպրոցում հայոց լեզու և գրականություն դասավանդող Գայանե Խեչումյանն իր աշակերտների հետ նախաձեռնել է համայնքային զարգացման ծրագիր իրականացնել:
Վերին Հոռաթաղում ընթերցասրահ կբացվի
ՍՏԵՓԱՆԱԿԵՐՏ, նոյեմբերի 29, ԱՐՑԱԽՊՐԵՍ։ «Արցախպրես»-ի թղթակցի հետ զրույցում Գայանե Խեչումյանը նշեց, որ մտադիր են դպրոցի նկուղային հարկում հիմնել ընթերցասրահ, որը կծառայի ֆիլմերի դիտման, բանավեճերի, գրքերի քննարկումների համար, ինչպես նաև կունենան միջավայր, որտեղ պատանիները ազատորեն կկարողանան ինքնադրսևորվել, արտահայտել իրենց մտքերը, խոսել իրենց երազանքների մասին և ուղիներ մշակել դրանք իրագործելու համար։
«Երբ առաջին անգամ եկա դպրոց, փոխտնօրենը ցույց տվեց ամբողջ դպրոցը, այդ թվում` նկուղային հարկը։ Երբ տեսա այդ հարկը, մտածեցի` այ քեզ հրաշք, ինչքան բան կարելի է անել այստեղ: Հետո այդ միտքը կարծես մղվեց հետին պլան, մինչ այն պահը, երբ Փոփոխությունների հիման վրա ուսումնառության խմբակի պարապմունքների ընթացքում կատարեցինք համայնքի հնարավորությունների վերլուծություն, և աշակերտները իրենք կանգ առան ընթերցասրահ ունենալու գաղափարի վրա, որը պետք է լինի նկուղային հարկում. խորհրդանշական ստացվեց: Արդեն որոշակի քայլեր արված են, ծրագիրը պատրաստել ենք, հիմա դրամահավաքի փուլում ենք: Փորձում ենք ակտիվ տարածել համացանցի միջոցով, ընկերների շրջանում և գտնել հովանավորներ, ովքեր պատրաստ կլինեն նվիրատվություն անել: Կարծում եմ՝ ծրագիրը համայնքի և, հատկապես, դպրոցի համար կլինի շարժիչ ուժ. կենտրոնը կհամախմբի երիտասարդներին, կնպաստի համայնք-սփյուռք կապերի ամրապնդմանը և, ինչու չէ, կծնի նոր գաղափարներ: Ծրագրի իրականացումից հետո ակնկալում եմ տեսնել պատրաստակամ, առաջնորդ աշակերտների, որոնք հավատում են իրենց ներուժին և գիտեն, որ կարող են նպաստել դրական փոփոխությունների», - նշեց Գ. Խեչումյանը:
