ՆԱՏՕ-ի բոլոր անդամները համերաշխ են Ուկրաինայի հետ և անհրաժեշտության դեպքում պատրաստ կլինեն գործել ընդդեմ Ռուսաստանի։
Ուկրաինայում իրավիճակի ապակայունացման դեպքում՝ ԱՄՆ-ը Ռուսաստանին սպառնացել է «աննախադեպ պատժամիջոցներով»
«Մենք վճռական ենք Մոսկվային ուղղված մեր ուղերձում։
Եթե նրանք քայլեր ձեռնարկեն Ուկրաինայում վիճակն ապակայունացնելու համար և օգտագործեն իրենց ուժերը Ուկրաինայի դեմ ագրեսիայի համար, ապա պատասխանը կլինի շատ լուրջ՝ կձեռնարկվեն տնտեսական և այլ պատժամիջոցներ, որոնք նախկինում չեն եղել», - ասել է նա:
Պատասխանելով Ուկրաինայի եվրոպական և եվրատլանտյան ինտեգրման հեռանկարների մասին հարցին՝ ԱՄՆ պետքարտուղարի տեղակալը մատնանշել է, որ երկիրը «ուղի է հարթում իր համար դեպի ՆԱՏՕ և ԵՄ»։
«Դա պահանջում է նրա խորը և ակտիվ բարեփոխումները տնտեսության, դատական համակարգի և կոռուպցիայի դեմ պայքարում»,- պարզաբանել է նա։ Պաշտոնյայի խոսքով, ԱՄՆ-ը կարող է աջակցող դեր խաղալ Դոնբասի հակամարտության կարգավորման գործում՝ համագործակցելով Կիևի հետ վերաինտեգրման ուղղությամբ նրա հետագա առաջընթացի հարցում։
«Մենք հավատում ենք, որ Միացյալ Նահանգները կարող է աջակցող դեր խաղալ Դոնբասի հակամարտության կարգավորման հարցում, ինչպես դա արեցինք 2014-2016 թվականներին, երբ մենք փոփոխեցինք նորմանդական ձևաչափը (Գերմանիա, Ռուսաստան, Ուկրաինա, Ֆրանսիա - ՏԱՍՍ-ի նշումը) աշխատելով Կիևի հետ զուգահեռ՝ ավելի լավ հասկանալու համար, թե ինչպես եք տեսնում Դոնբասի ապագան, ինչպես եք նախատեսում վերաինտեգրել նրա բնակչությանը և ինչպես եք կազմակերպելու հարաբերությունները»,- ասել է նա։
Խոսելով հակամարտության կարգավորման ուղիների մասին՝ Նուլանդն ասել է, որ ԱՄՆ-ն աջակցում է մինսկյան համաձայնագրերին, սակայն կարծիք է հայտնել, որ «բանակցությունները փակուղում են։
Նա հայտարարել է, որ «Մինսկի» համաձայնագրերի շատ կետեր չեն կատարվել՝ նշելով, որ այս փաստաթղթում «սատանան մանրամասների մեջ է»։ Նրա կարծիքով, Դոնբասի հարցը պետք է քննարկվի ինչպես Ռուսաստանի, այնպես էլ Ուկրաինայի ներսում։ Ի թիվս այլ թեմաների, Նուլանդն անդրադարձել է նաև Բելառուսի հարցին՝ հիշեցնելով, որ ԱՄՆ-ն և ԵՄ-ն արդեն պատժամիջոցներ են կիրառել Բելառուսի իշխանությունների դեմ։
Այժմ, նրա խոսքով, միգրանտների հետ կապված իրավիճակի պատճառով «Լուկաշենկոյի դեմ պատժամիջոցների նոր փաթեթի հնարավորություն» է փնտրում։ Հիշեցնենք, նախկինում Նուլանդը Եվրոպայի և Եվրասիայի հարցերով պետքարտուղարի օգնականն էր։
2013 թվականի սեպտեմբերից մինչև 2017 թվականի հունվար Նուլանդը ԱՄՆ նախագահ Բարաք Օբամայի վարչակազմում զբաղվել է, մասնավորապես, հետխորհրդային երկրներին վերաբերող հարցերով։
2014 թվականին Կիևում զանգվածային ցույցերի ժամանակ, որոնք ի վերջո հանգեցրին ուկրաինացի առաջնորդ Վիկտոր Յանուկովիչի պաշտոնից հեռացմանը, Նուլանդը արևմտյան պաշտոնյաներից մեկն էր, ով հրապարակավ աջակցում էր ցուցարարներին։ Նա վերջին անգամ Ուկրաինա էր այցելել այս տարվա մայիսին՝ ԱՄՆ պետքարտուղար Էնթոնի Բլինկենի հետ միասին։
