«Դասավանդի՛ր, Հայաստան» ծրագրի շրջանակներում Մարգարիտա Երվանդյանը ԱՀ Մարտակերտի շրջանի Գառնաքար համայնքի դպրոց է գործուղվել` որպես անգլերենի ուսուցչուհի։
Գառանաքար համայնքը մարզադաշտ կունենա
ՍՏԵՓԱՆԱԿԵՐՏ, 4 դեկտեմբերի, ԱՐՑԱԽՊՐԵՍ:«Արցախպրես»-ի թղթակցի հետ զրույցում Մ. Երվանդյանը նշեց, որ աշակերտների հետ կազմել և մշակել են «Առողջ լինելու արվեստը» նախագիծը:
««Դասավանդի՛ր, Հայաստան» ծրագրի մասին լսելով` մասնակցելու պատրաստակամություն հայտնեցի, քանի որ մտահոգված էի աշակերտների կրթությամբ։ Ծրագիրը իմ աշակերտներին հնարավորություն տվեց մաս դառնալու Փոփոխությունների վրա հիմնված ուսումնառությանը, որի շրջանակներում աշակերտներս հանդես եկան փայլուն մտահղացմամբ՝ ունենալ մարզադաշտ, որտեղ կարող են զբաղվել սպորտով և վարել առողջ ապրելակերպ։
Թեմայի ընտրությունն առաջ քաշվեց` նախ ելնելով համայնքի հնարավորություններից ու աշակերտների հետաքրքրություններից։
Նախագծի իրականացման համար կազմել ենք իրատեսական ժամանակացույց և բյուջե, իսկ դրա համար մեզ անհրաժեշտ է 230 հազար ՀՀ դրամ։
Յուրաքանչյուրի կատարած փոքրիկ ներդրումը մեկ աշակերտի լուսավոր ժպիտ է և նպատակին հասնելու մեկ քայլ», - ասաց Մ. Երվանդյանը։ Մեր զրուցակցի խոսքով՝ նախագիծը իրականացնելուց հետո կհասնեն իրենց նպատակին, այն է՝ նպաստել երիտասարդների շրջանում սպորտի զարգացմանը:
«Համայնքի յուրաքանչյուր երեխա կարող է զբաղվել սպորտով և, ինչու չէ, կարող է հենց այդ ազդակը խթան հանդիսանալ այդ բնագավառում բազում հաջողությունների համար։ Հենց այս էլ կլինի Գառնաքար համայնքի զարգացման հիմնաքարերից մեկը», - հավելեց Մ. Երվանդյանը։