Տաթև Կարապետյանը ծնվել և մեծացել է Երևանում։2018 թվականից սկսած` ապրել և աշխատել է Արցախում` «Դասավանդի’ր, Հայաստան» Կրթական հիմնադրամի Արցախի տարածաշրջանային գրասենյակում` որպես Առաջնորդության զարգացման ղեկավար։ Նա, Օսըմ Արցախ հիմնադրամի ֆինանսական աջակցությամբ, ԱՀ Քաշաթաղի շրջանի Աղավնո համայնքում նախաձեռնել է իրականացնել «Խոսող գիրքը» ծրագիրը:
Աղավնոյում կիրականացվի «Խոսող գիրքը» ծրագիրը
ՍՏԵՓԱՆԱԿԵՐՏ, 6 դեկտեմբերի, ԱՐՑԱԽՊՐԵՍ:«Ներկայումս շարունակում եմ աշխատել Հիմնադրամում, բայց այլևս Արցախում չեմ ապրում, սակայն դա չխանգարեց ինձ ծրագիրը նախաձեռնել հենց Արցախում, քանի որ Արցախին սիրահարվում ես մեկ անգամ ու ընդմիշտ։
Նրա համոզմամբ՝ «Խոսող գիրքը» ծրագիրը պարզապես գրքերի նվիրատվության կամ գրադարանի բարեկարգման մասին չէ։
«Ծրագիրը նախ և առաջ նախատեսված է երեխաների շրջանում գրականության և արվեստի հանդեպ սերը մեծացնելու համար։ Աշակերտները հնարավորություն են ստանալու «կենդանի» շփում ունենալու գրքերի հետ՝ ինտերակտիվ հանդիպում-քննարկումներ և աշխատարաններ ունենալով գրողների, թարգմանիչների ու արվեստագետների հետ, ովքեր նրանց առաջ կբացեն գրքերի և գրականության գաղտնիքները, խորապես կծանոթացնեն գրական գործերի կերպարային և սյուժետային առանձնահատկություններին՝ այդպիսով խթանելով նաև երեխաների ստեղծագործականությունը։
Նպատակն այն է, որ երեխաները հասկանան, որ գրողները «մեռած մարդիկ չեն», գրականությունը կենդանի է, մեզ հետ, մեր կողքին ապրում են գրքերի հերոսները, գրողները, նրանք միայն գրականության դասագրքերում չեն։ Հենց այդ նկատառումով է ծրագիրը կոչվում «Խոսող գիրքը», որպեսզի գրքերը գրադարակներից դուրս գան, մարդկային կերպ ստանան ու «խոսեն» երեխաների հետ։ Ծրագրի շրջանակներում ձեռք են բերվելու ժամանակակից գրողների և արվեստագետների այն գրական գործերը (հաշվի առնելով նաև երեխաների տարիքային առանձնահատկություններն ու նախասիրությունները), որոնց շուրջ էլ հենց տեղի են ունենալու հանդիպումները համայնքում։ Ծրագրի առանցքում դրել եմ գրականությունը, ընթերցանությունը՝ որպես անձի աշխարհայացքի, արժեհամակարգի, երևակայության, գեղագիտական ընկալումների և աշխարհընկալման ձևավորման միջոց», - ներկայացրեց Տ. Կարապետյանը։
Մեր զրուցակցի խոսքով՝ այժմ թիրախային գրքերի ձեռքբերման, հատուկ ծրագրի համար նախատեսված գրադարակի, հյուրերի և այցերի պլանավորման փուլում են. մինչև տարեվերջ կունենան առաջին գրական այցը համայնք և ծրագրի պաշտոնական մեկնարկը։ Ծրագրի շրջանակներում կունենան հինգ այց-քննարկում գրող-արվեստագետների հետ, նաև՝ ամփոփիչ փակման միջոցառում։
«Ծրագրի ամենամեծ հաղթանակը կհամարեմ երեխաների ընթերցասիրության բարձրացումը, նաև համոզված եմ, որ գրողների և արվեստագետների հետ կենդանի շփումը առանցքային դեր կունենա արվեստի ճանաչման և գնահատման հարցում, ինչու չէ, գուցե նաև ստեղծագործական տաղանդներ բացահայտելու հնարավորություն կտա։ Մյուս կողմից, ինչպես արդեն նշել եմ, Աղավնոն կամքի ու պայքարի խորհրդանիշ է, ուստի ծրագրի միջոցով նպատակ ունեմ ավելի ճանաչելի դարձնել համայնքն ու տեղի մարդկանց՝ իրենց հերոսական կյանքով։ Ծրագրի իրականացման ընթացքում նաև կաշխուժանան գյուղի կյանքն ու առօրյան, կփորձենք շարունակական կապեր ամրապնդել և հնարավորություններ ստեղծել գյուղում մշակութային կյանքի զարգացման և հնարավորությունների ստեղծման համար», - հավելեց Տ. Կարապետյանը։