«Դասավանդի՛ր, Հայաստան» ծրագրի շրջանակներում Տարոն Պողոսյանը դասավանդում է «ՆԶՊ և անվտանգ կենսագործունեություն» առարկան ԱՀ Մարտակերտի շրջանի Մոխրաթաղ համայնքի Գարիկ Պողոսյանի անվան միջնակարգ դպրոցում:
«Մեր գյուղի ճանապարհը». Մոխրաթաղում համայնքային ազդեցության նախագիծ կիրականացվի
ՍՏԵՓԱՆԱԿԵՐՏ, 13 դեկտեմբերի, ԱՐՑԱԽՊՐԵՍ։ Նա իր աշակերտների հետ կազմել և ներկայացրել է «Մեր գյուղի ճանապարհը» նախագիծը, որի օգնությամբ կկարողանան բարեկարգել գյուղ տանող ճանապարհը:
«Արցախպրես»-ի թղթակցի հետ զրույցում Տ. Պողոսյանը նշեց, որ «Հայրենաճանաչություն» մեծ գաղափարի իրականացման գործում որպես խոչնդոտ հանդիսանում է գյուղ տանող ճանապարհի ներկայիս վիճակը (քամու հետևանքով աղբը տարածվում է ճանապարհով մեկ՝ առաջացնելով տհաճ տեսարան և հակահիգիենիկ վիճակ), ինչն էլ կփորձեն շտկել։
«Մտահղացումը աշակերտներինն է, ես փորձել եմ ուղղորդել։ Օգնել եմ այն հարցերում, որոնցում նրանք դժվարանում էին։ Այս փոքր նախագծի իրականացմամբ սկիզբ կդրվի ավելի մեծ ու ծավալուն աշխատանքի՝ խոսքը վերաբերում է հայրենաճանաչությանը։ Ցանկապատման ներկայացրած հատվածը սահմանակից է Մոխրաթաղ տանող ճանապարհին։ Այդ ճանապարհը միակն է, որ ուղեկցում է դեպի Մոխրաթաղի պատմամշակույթային արժեքներ: Ցանկապատելով մեր գյուղի ճանապարհի և աղբանոցի շփման հատվածը, կկարողանանք սկիզբ դնել «Հայրենաճանաչության» զարգացման մեր մեծ գաղափարին։ Հետագայում, երբ այս նախագծին հաջորդող նախագծերը կարողանանք կյանքի կոչել և պատշաճ ներկայացնել համայնքի պատմամշակույթային արժեքները, այդ ամենը տեսնելու և դրանցով հիանալու համար տարածք կարող են գալ հնագետներ, զբոսաշրջիկներ, մարդիկ, ովքեր հետաքրքրված են Արցախ աշխարհի հնագույն բնակավայրերով։ Հուսով եմ, որ այս նախագծերը համայնքը կդարձնեն ավելի ճանաչված և նոր հաջողությունների գրավականը կդառնան։ Մեր ծրագիրը առաջինը հենց համայնքի ղեկավար Նորայր Ամիրյանի ուշադրությանը արժանացավ, և նա հանձն առավ իրականացնել ծրագրի ամենածավալուն ու աշխատատար մասը, ինչի համար շատ շնորհակալ ենք նրան», - նշեց Տ. Պողոսյանը: