ԱՀ Մարտակերտի շրջանի Ճանկաթաղ համայնքը 357 բնակիչ ունի:
Ճանկաթաղը մանկապարտեզի կարիք ունի. առօրյան ու խնդիրները ներկայացնում է համայնքապետը
ՍՏԵՓԱՆԱԿԵՐՏ, դեկտեմբերի 23, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է Ճանկաթաղ համայնքի ղեկավար Սասուն Վանյանը:
«44-օրյա պատերազմից հետո տեղահանված 7 ընտանիք է հաստատվել համայքնում: Դպրոցի շենքը գտնվում է վթարային վիճակում, այստեղ սովորում է 59 աշակերտ: Մանկապարտեզ չունենք, բայց գյուղում նախադպրոցական տարիքի երեխաները շատ են։ Համայնքում գործում է բուժկետ՝ շենքային բարվոք պայմաններով: Ակումբը 3 տարի առաջ է վերանորոգվել: Հանդիսությունների սրաք չունենք. մի քանի տարի առաջ «Բեյզ Մեթլս» ընկերության ֆինանսավորմամբ սկսվել էին կառուցման աշխատանքներ, սակայն պատերազմից հետո դրանք դադարեցվել են: Գյուղն ապահովված է էլեկտրաէներգիայով, գազաֆիկացված չէ, ունենք ջրի խնդիր»,- ներկայացրել է համայնքապետը:
Մեր զրուցակիցը ցավով է նշել, որ 2020 թվականի աշնանային պատերազմում 6 համագյուղացի է զոհվել. այս պահի դրությամբ կառավարության ֆինանսավորմամբ վերանորոգվում են նրանց տները:
Ս. Վանյանի խոսքով՝ պատերազմից հետո գյուղացիներն անցել են իրենց բնականոն կյանքին. հիմնականում հողն են մշակում, մեղվաբուծությամբ զբաղվում, իսկ երիտասարդների մեծ մասն աշխատում է «Բեյզ Մեթլս» ընկերությունում: