Արցախի Հանրապետության Մարտունու շրջանի Կաղարծի համայնքի միջնակարգ դպրոցում ուսումնական գործընթացը կազմակերպվում է բնականոն հունով, աշակերտները պարտաճանաչ հաճախում են դպրոց՝ պահպանելով հակամաճարակային կանոնները։
Կաղարծու միջնակարգ դպրոցում վերանորոգման աշխատանքներ են ընթանում (լուսանկարներ)
ՍՏԵՓԱՆԱԿԵՐՏ, 23 դեկտեմբերի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է դպրոցի տնօրեն Լյուդմիլա Հայրապետյանը և նշել, որ դպրոցում սովորում է 42 աշակերտ: «Մենք առաջնորդվում ենք ուսումնական տարվա սկզբին հաստատված պլանով, որում ընդգրկված են ռազմահայրենասիրական հագեցած միջոցառումներ:
Դպրոցի դասարաններն անվանակոչել ենք արցախյան պատերազմի հերոսների անուններով և յուրաքանչյուր դասարանում ունենք նրանց նվիրված անկյուն։
Աշակերտներն իրենց պարտավորված են զգում հերոսների ծննդյան օրերին կազմակերպել միջոցառումներ ՝ խոստանալով շարունակել նրանց գործը: Մենք մեր պարտքն ենք համարում ապագա զինվորներ դաստիարակելը», - ասաց Լ. Հայրապետյանը:
Հայ կրթական հիմնարկության աջակցությամբ դպրոցում ընթանում են վերանորոգման աշխատանքներ:
«Դասավանդի՛ր, Հայաստան» ծրագրի շրջանակներում Երևանից Կաղարծու միջնակարգ դպրոց է գործուղվել Աննա Արսենյանը՝ լրացնելով անգլերեն լեզվի մասնագետի թափուր հաստիքը: «Նա լավ է տիրապետում իր առարկային, ակտիվ մասնակցում է հասարակական միջոցառումներին, հետաքրքիր է անցկացնում դասը և, ի ուրախություն մեզ, մտադիր է երկար մնալ մեր համայնքում», - հավելեց տնօրենը:
