ՀՀ-ում ԱՄՆ-ի դեսպան Լին Թրեյսին ամանորյա շնորհավորական ուղերձ է հղել հայ ժողովրդին:
ԱՄՆ-ն կշարունակի աշխատել Հայաստանի հետ հանուն ավելի լավ ապագայի. դեսպան Թրեյսին շնորհավորական ուղերձ է հղել
ՍՏԵՓԱՆԱԿԵՐՏ, 30 դեկտեմբերի, ԱՐՑԱԽՊՐԵՍ: Հայ ժողովրդին ուղղված իր տոնական ուղերձում դեսպան Թրեյսին հետադարձ հայացք է նետել Հայաստանում պաշտոնավարելու իր ժամանակաշրջանին: Նա վերահաստատել է ԱՄՆ հանձնառությունը՝ շարունակելու գործակցությունը Հայաստանի հետ՝ հանուն ավելի լավ ապագայի։ Դեսպանը գովեստով է խոսել Հայաստանի հարուստ մշակութային ավանդույթների, բազմամյա պատմության, գեղեցիկ բնաշխարհի և հայտնի հյուրընկալության մասին միևնույն ժամանակ ընդգծելով, որ այս երկրի ամենամեծ արժեքը հայ մարդն է՝ իր ձիրքով, անսպառ էներգիայով, տոկունությամբ և ստեղծարարարությամբ։
«Շնորհավոր Նոր տարի և Սուրբ ծնունդ: Այս տարին լի էր մարտահրավերներով, սակայն երբ հետադարձ հայացք եմ նետում ողջ կատարվածին, հայ ժողովրդի ու Հայաստանի հանդեպ տոգորվում եմ հիացմունքի անսասան զգացումով: Երբ 2019 թվականի սկզբին որպես ԱՄՆ-ի դեսպան ժամանեցի Հայաստան, միանգամից հասկացա, որ մի առանձնահատուկ բան կա Հայաստանի հետ կապված: Հայաստանն առանձնանում է իր հարուստ մշակութային ավանդույթներով, հազարամյա պատմությամբ, բնական գեղեցկությամբ և հանրահայտ հյուրընկալությամբ, բայց այս երկրի ամենամեծ արժեքը հայ մարդն է՝ իր ձիրքով ու տաղանդով, ստեղծարարությամբ:
Վերջին երեք տարվա ընթացքում Հայաստանում շատ եմ ճանապարհորդել, որտեղ եղել եմ, այնտեղ տեսել եմ խիզախություն, ուժ ու կորով, հույս, տոկունություն և նվիրվածություն ավելի լավ ապագա կերտելու գործին՝ ի հեճուկս մարտահրավերների ու դժվարությունների: Ես հպարտ եմ այն գործընկերությամբ, որը ձևավորել են Միացյալ նահանգներն ու հայ ժողովուրդը վերջին 30 տարվա ընթացքում և այն խորը կապը, որոնք սկիզբ են առել շատ ավելի վաղ և հիմք են հանդիսանում ապագայում ավելի սերտ կապեր հաստատելու համար: Հպարտ եմ, որ շարունակում ենք մեր օժանդակությունը Հայաստանի մշակութային ժառանգության պահպանման և վերականգնման ջանքերին: Այս պահին իրականացվում են աշխատանքներ Սանահին վանական համալիրում, ինչի շնորհիվ այս եզակի համալիրը կպահպանվի հաջորդ սերունդների համար: Ես ոգևորություն եմ ապրում, երբ ԱՄՆ Միջազգային զարգացման գործակալության աջակցությամբ իր գործունեությունը սկսած բիզնեսը կարողանում է նոր շուկաներ մուտք գործել ու աշխատատեղեր ստեղծել: Ինձ համար ուրախալի է, երբ ԱՄՆ-ի կառավարության կրթական ծրագրերի հայաստանյան մասնակիցները, վերադառնալով Հայաստան, իրենց նոր գիտելիքներն ու հմտություններ ծառայեցնում են իր համայնքների, շրջապատի բարելավմանը: Սրանք մեր բազմակողմ գործընկերության պարզապես մեկ, երկու օրինակ է: Կասկած չկա, որ մարտահրավերները դեռ կշարունակվեն, բայց Հայաստանի յուրահատկությունն այն է, որ այս երկրի մարդկանց բնորոշ է դիմացկունությունը, տոկունությունը և ուժը: ԱՄՆ-ն կշարունակի աշխատել Հայաստանի հետ հանուն ավելի լավ ապագայի: Նոր տարում բոլորիդ մաղթում եմ խաղաղություն, առողջություն ու բարեկեցություն»,-ասված է շնորհավորական ուղերձում:
