Համազգային հայ կրթական և մշակութային միության Արցախի գրասենյակը, հովանավորությամբ Արցախի Մարտունի քաղաքում բնակվող հայրենադարձ Շանթ Չարշաֆճեանի, այս օրերին կազմակերպում է Շուշիի պետական թատրոնի հյուրախաղերն Արցախի մի շարք գյուղերում։
Շուշիի թատրոնը` Արցախի գյուղերում. փոքրիկների համար տիկնիկային ներկայացումներ են ցուցադրվում
ՍՏԵՓԱՆԱԿԵՐՏ, 11 հունվարի, ԱՐՑԱԽՊՐԵՍ։ Ցուցադրվում են տիկնիկային ներկայացումներ։ Որոշ համայնքների մանուկներ արդեն հասցրել են դիտել ներկայացումները, որոշներում էլ կկազմակերպվեն առաջիկա օրերին։
Համազգայինի Արցախի գրասենյակի տնօրեն Հերմինե Ավագյանը «Արցախպրես»-ի թղթակցի հետ զրույցում նշեց,որ պատերազմի հետևանքով Շուշիի թատրոնը կայուն գործունեության վերականգնման կարիք ունի։ Նա հույս ունի, որ այս հյուրախաղերը թատրոնի վերականգնման խթան կհանդիսանան։ Թատրոնի դերասանները ցրված են Գյումրիում,Երևանում և Ստեփանակերտում։
Համազգայինի Արցախի գրասենյակը և ծրագրի հովանավոր Շանթ Չարշաֆճեանը այս օրերին նրանց համախմբել են Արցախում։
«Գիտեք, որ գյուղերի մի մասը թշնամու անմիջական դիտակետում է, և տնից ակումբ գնալն անգամ վտանգավոր է, բայց, միևնույն է, երեխաները գալիս են դիտելու ներկայացումները, որովհետև դրա կարիքը շատ ունեն»,-նշեց Հերմինե Ավագյանը և շնորհակալություն հայտնեց հայրենադարձ Շանթ Չարշաֆճեանին, ով ընդառաջեց Համազգայինի Արցախի գրասենյակի այս նախաձեռնությանը և հովանավորեց այն՝ օրինակ ծառայելով շատերի համար։
Նշենք, որ Արցախի գյուղերում տիկնիկային ներկայացումներ են ցուցադրվելու նաեւ ամռանը։ Թատրոնը հյուրընկալվելու է այն գյուղերում, որտեղ այս օրերին չհասցրեց այցելել։
