2022 թվականի հունվարի 19-ին տեղի ունեցած տեխնիկական խնդիրները լուծված են։ Իրանական կողմի տվյալներով՝ թուրքական կայանում տեղի էր ունեցել գազի արտահոսք։

Թուրքական գազի փոխադրման BOTAS օպերատորը հայտարարել էր 2022 թվականի հունվարի 20-ին Իրանից Թուրքիա գազի մատակարարումների դադարեցման մասին։

Արդեն հունվարի 17-ին Իրանի և Թուրքիայի սահմանին գտնվող Գուրբուլակ գազաչափական կայանի (GIS) ճնշումը սկսել էր ընկնել։ Մատակարարումները կրճատվել էին մինչև օրական պայմանագրային ծավալի 1/3-ը, իսկ հունվարի 20-ին ծավալը հասել էր 0-ի։ Կառույցից ծանուցել են թուրք գործընկերներին, որ հունվարի 20-ից սկսած 10 օրով գազի մատակարարումները կդադարեցվի տեխնիկական անսարքության պատճառով։ Հիշեցնենք, որ Իրանը Թուրքիային մատակարարում է տարեկան միջինը 10 մլրդ մ3 գազ Թավրիզ-Անկարա մայրուղային գազատարով (MGP):

Վերջին տվյալներով՝ 2021 թվականին իրանական գազի մասնաբաժինը Թուրքիայի էներգետիկ հաշվեկշռում կազմել է մոտ 16 տոկոս։ Գազափոխադրման նախորդ խոշոր միջադեպը տեղի էր ունեցել գրեթե 2 տարի առաջ: 2020 թվականի մարտի 31-ին իրանական գազի մատակարարումները Թուրքիա դադարեցվել էին գազատարի հատվածում պայթյունի հետևանքով, որը տեղի էր ունեցել Թուրքիայի արևելյան Ագրի նահանգի Գուրբուլակ GIS-ի մոտակայքում՝ Իրանի հետ սահմանի մոտ:

Այն ժամանակ որպես պայթյունի պատճառ նշվում էր ահաբեկչությունը։ Նախկինում գազատարի վրա մի քանի պայթյուններ են եղել, հիմնականում՝ Թուրքիայում քրդերի քաղաքական իրավունքների և Թուրքիայի կազմում քրդական ինքնավարության ստեղծման համար պայքարող Քրդստանի աշխատավորական կուսակցության գործողությունների հետևանքով։