ՀՀ-ում Արցախի ներկայացուցչությունում «Հայաստանի սոցիալական աշխատողների ասոցիացիա»-ի նախաձեռնությամբ և Ներկայացուցչության հետ համագործակցության շրջանակում Արցախից տեղահանված քաղաքացիների համար մեկնարկել են սոցիալական աշխատանքի մասնագետների պատրաստման եռամսյա դասընթացներ։
Արցախից տեղահանվածների համար սոցիալական աշխատանքի մասնագետների պատրաստման դասընթացներ են մեկնարկել
ՍՏԵՓԱՆԱԿԵՐՏ, մայիսի 17, ԱՐՑԱԽՊՐԵՍ։ «Հայաստանի սոցիալական աշխատողների ասոցիացիա»-ի նախագահ Միրա Անտոնյանի խոսքով` նման նախաձեռնություններ տարբեր խմբերի շրջանում Հայ օգնության ֆոնդի երեխաների կենտրոնի և ԵՊՀ մասնագետների հետ Արցախում արդեն իրականացրել են։ Երևանում, սակայն, առաջին անգամ են կազմակերպում արցախցի տեղահանվածների համար, ինչը հնարավոր դարձավ «REACT» հակամարտությունից տուժած անձանց հումանիտար աջակցության և ինտեգրման ծրագրի շնորհիվ։
«Հայ օգնության ֆոնդի և Հայ կրթական հիմնադրամի միջոցներով Արցախում կազմակերպվող արագացված դասընթացներում ընդգրկված մոտ 100 մասնակիցներից 32-ն արդեն անցել են աշխատանքի նորաբաց սոցիալ-հոգեբանական աջակցության կենտրոններում։ Մյուսները կանցնեն աշխատանքի, երբ տեղերում բացվեն նոր կենտրոններ։ Եթե Հայաստանում բնակվող տեղահանված արցախցիների շրջանում սովորել ցանկացողների շատ լինեն, ևս մեկ խումբ կպատրաստենք։ Ըստ մեր հաշվարկների` ՀՀ-ում գտնվող արցախցիների հետ աշխատելու համար անհրաժեշտ է մոտ 35 մասնագետ, ովքեր կընտրվեն վերապատրաստված 50 կամ ավելի մասնակիցներից։ Ցանկացողները կարող են գրանցվել ասոցիացիայի կայք-էջում»,- նշեց մեր զրուցակիցը և հավելեց դասընթացն ավարտելուց հետո մասնակիցներին տրամադրվում են հավաստագրեր. նրանք ստանում են նաեւ աջակցություն՝ աշխատանք գտնելու հարցում։