Արցախի ազգային նվագարանների պետական նվագախմբի և ԱՀ ԿԳՄՍ նախարարության մշակույթի վարչության ժամանակակից արվեստի և մշակութային կրթության բաժնի կողմից կազմակերպվել է «Ազգային նվագարանները դպրոցում» դաս-համերգների ծրագիր, որի շրջանակներում դպրոցականները ծանոթանում են ազգային նվագարաններին, ինչն նպաստում է նաեւ մասնագիտության ընտրությանը:
Ազգային նվագարանների պետական նվագախումբը հանրակրթական դպրոցներում դաս-համերգների շարք է մեկնարկել
ՍՏԵՓԱՆԱԿԵՐՏ, մայիսի 17, ԱՐՑԱԽՊՐԵՍ։ Այս մասին «Արցախպրես» -ի հետ զրույցում նշել է Արցախի ազգային նվագարանների գեղարվեստական ղեկավար Լևոն Սարդարյանը:
«Նախաձեռնված ծրագրի շրջանակներում այցելել ենք Բերձորի, մայրաքաղաք Ստեփանակերտի համար 1, 5, 6, 9 դպրոցներ: Դպրոցականների համար հնարավորություն ստեղծեցինք ծանոթանալ ազգային նվագարաններին, սերտել ժողովրդական գործիքների յուրահատկությունները, փորձեցինք նրանց մեջ հետաքրքրություն և սեր առաջացնել դեպի հայկական ազգային-ժողովրդական երաժշտությունը:
Նաեւ աշակերտներին հայկական ազգային երաժշտությունը վայելելու հնարավորություն ընձեռնեցինք: Ազգայինի պահպանումն ու այդ շնչով նոր սերնդի դաստիարակությունն այսօր յուրաքանչյուրիս համար առաջնային պետք է լինի»,-ներկայացրել է Լ. Սարդարյանը:
Մեր զրուցակիցը նշել է նաև, որ ծրագիրը շարունակական է լինելու և ներդրվելու է հանրակրթական այլ դպրոցներում ևս։
