ՍՏԵՓԱՆԱԿԵՐՏ 19 մայիսի, ԱՐՑԱԽՊՐԵՍ։ Այս մասին հայտնում է Հայ դատի կենտրոնական խորհուրդը։

 

Հանձնախումբը գործող դեսպանին տվել է F (failure/ձախողում) գնահատականը։ Նշվում է, որ անցնող գրեթե մեկուկես տարում դեսպան Թրեյսին ձախողել է հայ ժողովրդի համար խիստ կարևորություն ունեցող այնպիսի բնագավառներում, ինչպիսիք են արցախցի տեղահանված անձանց համար ամերիկյան օժանդակության բացակայությունը, Հայաստանի անվտանգության և տարածաշրջանային հարաբերությունների շարունակական բարդացումը, հայ ռազմագերիների անօրինական կալանավորումներին, բռնություններին ու սպանություններին պատշաճ չանդրադառնալը։

 

Հայ դատի հանձնախումբն ընդգծում է, որ ԱՄՆ դեսպանը հայ քաղաքական դաշտում ֆավորիտներ ունի ու ցույց է տալիս դա։

 

«Հայ դատի հանձնախումբը ցանկանում է, որ Հայաստանում ԱՄՆ-ի յուրաքանչյուր դեսպան լինի հաջողակ: Ցավոք, դեսպան Թրեյսին իր լռությանն ավելացրել է 44-օրյա պատերազմի ընթացքում ավելի քան 90 000 տեղահանված արցախահայերի և Հայաստանի ինքնիշխան տարածքում ադրբեջանական շարունակական ոտնձգությունների նկատմամբ անխոհեմ արհամարհանքը։ Հայաստանում դեսպանի պաշտոնում իր պաշտոնավարման երեք տարին լրանալուց հետո դեսպան Թրեյսին շարունակում է ձախողել հարց առ հարց՝ շատ հեռու լինելով Հայաստանում ամերիկյան հանձնառու դեսպանի հիմնական մասնագիտական որակներից»,- ասված է հայտարարության մեջ։

 

ԱՄՆ դիվանագիտական ծառայության աշխատակիցները երեք տարին մեկ ռոտացիայի են ենթարկվում և ստանում նոր դիվանագիտական հանձնարարություն: Քանի որ Հայաստանում գործող դեսպանի երեք տարին արդեն լրացել է, Հայ դատի հանձնախումբը նախագահ Բայդենի վարչակազմին կոչ է անում ամուր հիմքերի վրա վերականգնել ԱՄՆ-Հայաստան հարաբերությունները և նոր դեսպան առաջադրել։