Թուրքիայի առողջապահության նախարար Ֆահրեթթին Քոջան հանդես է եկել Ուկրաինայում «հուսալի բժշկական միջանցք» ստեղծելու նախաձեռնությամբ՝ դիմակայության գոտուց վիրավորներին ու հիվանդներին տարհանելու համար։
Թուրքիան առաջարկում է Ուկրաինայում ստեղծել «բժշկական միջանցք» հիվանդների և վիրավորների տարհանման համար
ՍՏԵՓԱՆԱԿԵՐՏ, 24 մայիսի, ԱՐՑԱԽՊՐԵՍ։ Ինչպես գրում է Panorama.am-ը, այդ մասին նա հայտարարել է Ժնևում Առողջապահության համաշխարհային 75-րդ վեհաժողովում։
«Հակամարտության գոտուց հիվանդներին և վիրավորներին տարհանելու համար անհրաժեշտ է ստեղծել հուսալի բժշկական միջանցք: Ես կխնդրեի միջազգային հանրությանը` Առողջապահության համաշխարհային կազմակերպության գլխավորությամբ, աջակցել այս առաջարկին: Թուրքիան պատրաստ է տարհանման և բուժօգնության հարցերում անել իրենից կախված ամեն ինչ»,-ասել է նախարարը։
Նրա խոսքով, Թուրքիան մարդասիրական օգնության շրջանակներում դեղորայք ու դեղամիջոցներ է ուղարկում Ուկրաինա։
