Ստեփանակերտի Սայաթ-Նովայի անվան երաժշտական քոլեջի երգչխախումբը համերգով հյուրընկալվել է Կոմիտասի անվան երաժշտական դպրոցում
Այսօր` մայիսի 26-ին, մայրաքաղաքի Կոմիտասի անվան երաժշտական դպրոցը հյուրընկալել է Սայաթ-Նովայի անվան պետական երաժշտական քոլեջի ուսանողներին:
Ստեփանակերտի Սայաթ-Նովայի անվան երաժշտական քոլեջի երգչխախումբը համերգով հյուրընկալվել է Կոմիտասի անվան երաժշտական դպրոցում
ՍՏԵՓԱՆԱԿԵՐՏ 26 մայիսի, ԱՐՑԱԽՊՐԵՍ: Միջոցառման ընթացքում ելույթ են ունեցել երեք սերնդի` <<Թզուկներ>>, <<Ծիածան>>մանկապատանեկան և ուսանողական երգչախմբերը, որոնց գեղարվեստական ղեկավարն է Սայաթ-Նովայի անվան երաժշտական քոլեջի դասախոս և խմբավար Վիոլետա Բախշիյանը:
Միջոցառման ողջ ընթացքում երգչախմբերին նվագակցել է դաշնակահարուհի Քրիստինե Միրզոյանը: <<Արցախպրես>>-ի հետ զրույցում խմբավար Վ. Բախշիյանը շեշտում է, որ իր երգչախմբերի հետ միասին մեծ սիրով է միացել ուսումնարանի համերգային ցիկլին՝ նվիրված ուսումնարանի 60֊ամյակին:
<<Պատերազմից հետո շատ դժվար էր հոգեպես ապաքինվելը, այդ ընթացքը երկար տևեց, բայց մեր մասնագիտությունը առաջատար մասնագիտություն է, որով մենք պարտավորված ենք մեր ժողովրդին կյանքի կոչել>>,-նշել է մեր զրուցակիցը:
Կոմիտասի անվան երաժշտական դպրոցի տնօրեն Արթուր Պետրոսյանը ելույթի իր խոսքում շնորհակալություն հայտնեց նախաձեռնությունը կյանքի կոչելու համար։
<<Դպրոցի և ուսումնարանի միջև միշտ պետք է սերտ համագործակցություն լինի: Վստահ եմ, որ շարունակական կլինի այսպիսի միջոցառումների կազմակերպումը, որտեղ կընդգրկվեն ոչ միայն վոկալային, այլ նաև տարբեր գործիքային կատարումներ: Մենք նույնպես կցանկանայինք մեր համերգային ծրագրով այցելել ուսումնարան: Իսկապես, այսօր մեծ բավականություն ստացանք, ինչի համար ևս մեկ անգամ շնորհակալ ենք>>, - ասել է Ա. Պետրոսյանը:
Նա երաժշտական դպրոցի անունից շնորհակալագիր հանձնեց խմբավար Վ. Բախշիյանին` կրթօջախում երգչախմբային բարձր արվեստը զարգացնելու համար: