Այսօր՝ հունիսի 22-ին, Ստեփանակերտի Մշակույթի և երիտասարդության պալատում կայացել է Արցախի պետական ջազ նվագախմբի համերգը։
Մայրաքաղաքում կայացել է Արցախի պետական ջազ նվագախմբի համերգը
ՍՏԵՓԱՆԱԿԵՐՏ, 22 հունիսի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում նվագախմբի տնօրեն Տիգրան Սուչյանն ասել է, որ բավականին երկար են պատրաստվել համերգին։
«Ամիսներ շարունակ պատրաստվել ենք այս համերգին՝ հաղթահարելով բազում խոչընդոտներ։ Եթե որևէ մեկը հետաքրքրվում է ջազով, ապա նա պետք է իմանա մի կարևոր առանձնահատկություն․ երբ երաժշտությունը ստեղծվում է տվյալ պահին, քո կյանքի փորձը կիսում ես մարդկանց հետ, ապա դա իմպրովիզացիա է. ջազը բավականին անկանխատեսելի է»,-նշել է Տ. Սուչյանը։
Նա ընդգծել է` այսօր երաժշտական կոլեկտիվում մասնագետների պակաս է զգացվում` հույս հայտնելով, որ մոտ ապագայում նվագախմբի շարքերը կհամալրվեն։
