Բացառվում է Հայաստանի տարածքով միջանցքային տրամաբանությամբ որևէ ճանապարհ:
Հայաստանի տարածքով միջանցքային տրամաբանությամբ որևէ ճանապարհ բացառվում է. ՀՀ ԱԽ քարտուղար
ՍՏԵՓԱՆԱԿԵՐՏ, 30 հունիսի, ԱՐՑԱԽՊՐԵՍ: Այս մասին հունիսի 30-ի կառավարության նիստից հետո լրագրողների հետ ճեպազրույցում ասաց ԱԽ քարտուղար Արմեն Գրիգորյանը:
«Մեր քաղաքականությունը շարունակում է սա մնալ. երբ հայտարարում ենք, որ մեր դիրքորոշումներն ավելի մոտ են, դա նշանակում է, որ մենք առաջ ենք գնացել միայն այն տրամաբանությամբ, որ սահմանային վերահսկողություն է լինելու: Հայաստանում բացառվում է միջանցքային տրամաբանությամբ որեւէ ճանապարհ»,- ասաց նա:
ԱԽ քարտուղարի խոսքերով` ապաշրջափակումը քննարկվել է և՛ Մոսկվայում, և՛ Բրյուսելում.
«Երկար ժամանակ Ադրբեջանն ասում էր, որ միջանցք է քննարկվում: Եթե չեմ սխալվում, նոյեմբերի 6-ին, երբ ՌԴ փոխվարչապետ Օվերչուկը Երեւանում էր, հայտարարեց, որ միջանցքային տրամաբանությամբ որեւէ հարց չի քննարկվում: Նույնը եղավ Բրյուսելի բանակցություններից հետո: Միշելի խոսնակը հրապարակային հայտարարեց, որ որեւէ միջանցք երբեք չի քննարկվել: Սա ցույց է տալիս, որ բանակցություններում մեր մոտեցումը միշտ սա է եղել եւ շարունակում է սա մնալ»,-հավելեց նա:
ՀՀ անվտանգության խորհրդի քարտուղար Արմեն Գրիգորյանի և Ադրբեջանի նախագահի աշխատակազմի արտաքին քաղաքականության բաժնի ղեկավար Հիքմեթ Հաջիևի հունիսի 27-28-ին նախատեսված հանդիպումը տեղի չի ունեցել:
«Արմենպրես»-ի հաղորդմամբ` կառավարության նիստից հետո լրագրողների հետ զրույցում ԱԽ քարտուղար Արմեն Գրիգորյանն ասաց, որ դրանից առաջ ևս կար պայմանավորվածություն, բայց այն ևս հետաձգվել էր։
«Դեռևս հայտնի չեն հստակ պատճառները, թե ինչու է Ադրբեջանը հետաձգել հանդիպումը: Մենք ինֆորմացիա ունենք, որ հնարավոր է՝ ապագայում այդպիսի հանդիպում տեղի ունենա»,- ասաց Արմեն Գրիգորյանը:
