Ռուսաստանի ճարտարապետութան և շինարարական գիտությունների ակադեմիայի շինարարական ֆիզիկայի գիտահետազոտական ինստիտուտի (Научно-исследовательский институт строительной физики Российской академии архитектуры и строительных наук) և Ստեփանակերտում գործող Շուշիի տեխնոլոգիական համալսարանի միջև կնքվել է համագործակցության համաձայնագիր:
Ռուսական գիտահետազոտական ինստիտուտը և ՇՏՀ-ն համագործակցության համաձայնագիր են կնքել
ՍՏԵՓԱՆԱԿԵՐՏ, հուլիսի 6, ԱՐՑԱԽՊՐԵՍ։ «Արցախպրես»-ի հաղորդմամբ՝ այս մասին տեղեկացնում են Շուշիի տեխնոլոգիական համալսարանի լրատվական բաժնից:
Ռուսաստանի ճարտարապետութան և շինարարական գիտությունների ակադեմիայի շինարարական ֆիզիկայի գիտահետազոտական ինստիտուտի տնօրեն Իգոր Շուբինի և ՇՏՀ ռեկտոր Նվեր Միքայելյանի ստորագրած համաձայնագրով նախատեսվում է իրականացնել փոխշահավետ համագործակցություն կրթական և գիտական գործունեության ոլորտում, ստեղծել բարենպաստ պայմաններ համատեղ հեռանկարային հետազոտական, մշակութային, կրթական ծրագրերի իրականացման համար:
Ինստիտուտն ու Շուշիի տեխնոլոգիական համալսարանը նախատեսում են մասնակցել գիտահետազոտական նախագծերի, համագործակցել բակալավրիատի, մագիստրատուրայի և դոկտորական ծրագրերի, պրոֆեսորադասախոսական կազմի և ուսանողների ակադեմիական փոխանակման ոլորտներում: Համաձայնագիրն ուժի մեջ է ստորագրման պահից և կգործի 5 տարի:
