Ստեփանակերտի մշակույթի և երիտասարդության պալատում նախօրեին տեղի է ունեցել «Զարթոնք» երաժշտական ակադեմիայի գալա համերգը։
Ստեփանակերտում կայացել է «Զարթոնք» երաժշտական ակադեմիայի գալա համերգը
ՍՏԵՓԱՆԱԿԵՐՏ, 26 հուլիսի, ԱՐՑԱԽՊՐԵՍ: «Արցախպրես»-ի հաղորդմամբ՝ Սոնա Համալյանի հիշատակին նվիրված համերգային երեկոյին «Զարթոնք» ակադեմիայի տասնյակից ավելի սաներ ու դասախոսներ ներկայացրել են հայ և արտասահմանյան աշխարհահռչակ երգահանների ստեղծագործություններ։
Մեզ հետ զրույցում՝ «Զարթոնք» ակադեմիայի զարգացման տնօրեն Աննա Դեմիրճյանը նշել է, որ համերգն իրենց առաջին հայտն է Արցախում։
«Երաժշտության վերելքով՝ մենք եկել ենք Արցախ՝ ոգևորելու, ոգեշնչելու։ Մենք միշտ արցախցիների կողքին ենք։ Այս ծրագիրը, ճիշտ է, երկու շաբաթ է տևելու, բայց անպայման շարունակություն կունենա, քանի որ վարպետները կապ կպահպանեն իրենց սաների հետ։ Այս օրերին, շատ հաճախ նրանց շփումը շարունակվում է նաև դասերից հետո, ինչը մեզ հիմք է տալիս համոզվելու, որ այդ կապը կշարունակվի նաև ակադեմիայից հետո: Արդեն տեսնում ենք, որ երեխաները շատ ոգևորված են, նրանց աչքերը փայլում են։ Նախագծի մեկնարկի արդեն երկրորդ օրվանից նրանք սպասում էին նման համերգի»,- ասել է մեր զրուցակիցը՝ հավելելով, որ ծրագրով նաև Հայաստան-Արցախ-Սփյուռք ամուր կամուրջ է ստեղծվել, քանի որ ակադեմիային մասնակցում են նաև Մայր Հայաստանից, իսկ Սփյուռքի հետ ակտիվ համագործակցություն է ստեղծվել։
Ծրագրի մամուլի հետ կապերի պատասխանատու Քնարիկ Ներսիսյանի խոսքով՝ «Զարթոնք» ակադեմիան Արցախում է՝ խոսելու մշակույթի լեզվով։
«Մենք եկել ենք ասելու, որ միասին ուժեղ ենք և կորովով լի։ Եկել ենք սովորեցնելու և սովորելու։ Օրեր շարունակ մեր մասնագետները զարթոնքցի սաներին փոխանցում էին իրենց փորձն ու գիտելիքները, ոգևորությունն ու սերը»,-ասել է Ք․ Ներսիսյանը՝ նշելով, որ գալա համերգն այս օրերի աշխատանքի արդյունքն է։ Նա հատուկ շնորհակալություն է հայտնել նաև ծրագրի աջակիցներ Արցախի Հանրապետության կառավարությանը, ԿԳՄՍ նախարարությանը, Տարածքային կառավարման և ենթակառուցվածքների նախարարությանը։
Համերգի մասնակից, զարթոնքցի Մարիա Դավթյանը Ստեփանակերտի Սայաթ Նովայի անվան երաժշտական քոլեջի շրջանավարտներից է, ով այս տարի ընդունվել է Երևանի Կոմիտասի անվան կոնսերվատորիայի ակադեմիական վոկալ բաժին։ Նա կարևորել է նախագիծը՝ հմտությունների և մասնագիտական առաջընթացի համար անհրաժեշտ գիտելիքների ձեռքբերման առումով։
«Ակադեմիայում անհրաժեշտ գիտելիքներ ձեռքբերելու մեծ հնարավորություններ կան, քանի որ դասավանդում են տաղանդավոր մասնագետներ՝ Մայր Հայաստանից ու Սփյուռքից։ Այս ընթացքում շատ գիտելիքներ եմ ստացել, որոնք օգտագործելու եմ իմ ընտրած ասպարեզում։ Ակադեմիայի վարպետների մեծ մասը դասավանդում է այնտեղ,ուր շարունակելու եմ ուսումս։ Ես ուրախ կլինեմ, որ այդ կապը շարունակական լինի»,-ավելացրել է «Զարթոնք» ակադեմիայի մասնակիցը։
Համերգին ներկա էին նաև ԱՀ պետական նախարար Արտակ Բեգլարյանը, պաշտոնատար անձինք։
Հուլիսի 18-ից 31-ը, Ստեփանակերտի Սայաթ-Նովայի անվան երաժշտական քոլեջում անց են կացվում «Զարթոնք» արվեստի ակադեմիայի վարպետության դասերը՝ ժողովրդական, կամերային, դասական վոկալի եւ ջազ երաժշտության, գրաֆիկ դիզայնի և ստեղծագրության ժանրերում։ Ծրագիրն իրականացվում է «Ատգեն Արմենյան» հիմնադրամի նախաձեռնությամբ: Ակադեմիայի գեղարվեստական ղեկավարն է ՀՀ ժողովրդական արտիստ, օպերային երգչուհի Հասմիկ Պապյանը:
