Արցախի Հանրապետության Մարտունու շրջանի Կաղարծի համայնքում պետական միջոցներով հինգ տուն է վերակառուցվում տեղահանված ընտանիքների համար:
Կաղարծիում տեղահանված ընտանիքների համար հինգ տուն է կառուցվում
ՍՏԵՓԱՆԱԿԵՐՏ, 16 օգոստոսի, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է Կաղարծու համայնքապետ Գարուշ Սարգսյանը:
«Արցախյան երրորդ պատերազմից հետո համայնքում տեղահանված 15 ընտանիք է հաստատվել՝ 62 բնակչով: Նրանք ապահովված են բնակկենցաղային անհրաժեշտ պայմաններով, ինչպես նաև օգտվել են պետական աջակցության համապատասխան ծրագրերից: Տղամադկանց մեծ մասն արհեստավոր է, կարողանում են աշխատել ու ապրուստի միջոց վաստակել»,-հավելել է նա: Անդադառնալով գյուղատնտեսական տարվան ու բերքատվությանը, համայնքապետը բավարար գնահատեց հացահատիկայինների այս տարվա բերքատվությունը, որը միջինում կազմել է 20 ցենտներ: Համայնքի բնակիչները նախընտրում են զբաղվել նաև բանջարաբոստանային մշակությամբ: Այս ճյուղը, սակայն, տուժել է ջրի խնդրի պատճառով:
«Նախատեսվում է արտեզյան ջրհոր կառուցել: Էլեկտրասյուների մոտ 90 տոկոսը վթարային է, պետք է նորերը տեղադրվեն: Չնայած նման խնդիրներին, ամենակարևորն, այնուամենայնիվ, անվտանգությունն է: Մնացածը մեր քրտնաջան աշխատանքի շնորհիվ ինքներս կստեղծենք: Կարևորը՝ չենք հուսահատվում»,-նշել է Գ.Սարգսյանը:
