Այսօր՝ սեպտեմբերի 21-ին, Ստեփանակերտի Սայաթ-Նովայի անվան երաժշտական քոլեջի դահլիճում տեղի է ունեցել Արցախյան երրորդ պատերազմում նահատակված հերոսամարտիկ, Արցախի գրական ընտանիքի անդամ, բանաստեղծ Հայասեր Հովսեփյանի «Լռության փոխարեն» գրքի շնորհանդեսը:
«Լռության փոխարեն».կայացել է նահատակված բանաստեղծ Հայասեր Հովսեփյանի գրքի շնորհանդեսը
ՍՏԵՓԱՆԱԿԵՐՏ, 21 սեպտեմբերի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ գրքում, որը լույս է ընծայվել Հայասեր Հովսեփյանի մի խումբ ընկերների ջանքերով, ընդգրկված են նահատակված բանաստեղծի տարբեր տարիների ստեղծագործությունները:
Միջոցառմանը Հայասեր Հովսեփյանի մասին հուշեր է պատմել Արցախի Հանրապետության տարածքային կառավարման և ենթակառուցվածքների նախարար, նրա կուսակցական ընկեր Հայկ Խանումյանը:
«Ծանր է Հայասերի մասին անցյալով խոսելը: Մեր ընկերությունը գաղափարական հողի վրա էր հիմնված:
Այսօր, երբ կարդում եմ Հայասերի տարիներ առաջ գրված բանաստեղծոււթյունները, տեսնում եմ, որ մարգարեություններ են:
Առավել թանկի համար նա կյանքը դրեց զոհասեղանին և հեռվի տենչանքը բավարարեց հավերժի հեռավորությամբ»,-ասել է Հ. Խանումյանը:
Արցախի գրողների միությունը Հայասեր Հովսեփյանին հետմահու պարգևատրել է «Նարեկացի» մեդալով, որը նրա մայրիկին հանձնեց ԱԳՄ նախագահի տեղակալ, գրականագետ Ամալյա Գրիգորյանը:
«Հայասերը սխրագործել է ոչ միայն ռազմի դաշտում, այլ նաև գրականության մեջ: Երբ ընթերցում ենք նրա պոեզիան, հասկանում ենք, որ խոսում է քաղաքացի բանաստեղծը, գաղափարական բանաստեղծը:
Նա բավականին համարձակ էր իր ստեղծագործական մտքերում: Հայասերը գրականություն է բերել խրամատն ու խրամատային կյանքը:
Նա առաջնագծի պոետ է, ով ամեն օր տեսել է մահը, պատերազմը, որ մարմնացել է իր գրականության մեջ»,-նշել է Ա.Գրիգորյանը:
Հայասերի հարազատ կրթօջախի՝ Խնուշինակի դպրոցի Հայոց լեզվի և գրականության ուսուցչուհի Իրա Հարությունյանը մեզ հետ զրույցում պատմել է,որ նա բանաստեղծական առաջին քայլերը կատարել է 9-րդ դասարանից:
«Իմացա, որ բանաստեղծություններ է գրում: Նա ամաչելով, շփոթված ինձ ցույց տվեց գրածներից մեկը:
Կարդացի և խրախուսեցի, որ շարունակի: Երբ վտանգված էր հայրենիքը, Հայասերը գիտակցված գրիչը փոխարինեց զենքով:
Մենք կորցրեցինք տաղանդավոր մի երիտասարդի, ով ընդամենը 31 գարուն ապրեց»,-հավելել է ուսուցչուհին:
Հայասեր Հովսեփյանը 2015 թվականից Հայոց լեզու և գրականություն է դասավանդել Ծովատեղ համայնքի հիմնական դպրոցում:
Հերոսի մասին հուշեր պատմեցին նաև Հայասեր Հովսեփյանի մյուս ընկերները, գործընկերները՝ նրան բնութագրելով որպես նվիրված, վստահելի ընկեր, կենսասեր անձնավորություն: Միջոցառումն ուղեկցվել է բանաստեղծի ստեղծագործությունների ասմունքով:
