ՀՀ ազգային ժողովի նախագահ Ալեն Սիմոնյանը պատրաստվում է Ռուսաստան առաջիկա այցի ընթացքում քննարկել նաև ՀԱՊԿ-ի հետ կապված հարցերը:
Շատ հնարավոր է, որ ՀԱՊԿ-ն որոշում կայացնի դուրս գալ Հայաստանից. Ալեն Սիմոնյան
ՍՏԵՓԱՆԱԿԵՐՏ, 4 հոկտեմբեր, ԱՐՑԱԽՊՐԵՍ-ԱՐՄԵՆՊՐԵՍ։ Սիմոնյանն այս մասին ասաց ԱԺ-ում լրագրողների հետ ճեպազրույցում:
Անդրադառնալով ՀՀ վարչապետի հայտարարությանն առ այն, որ 100 միլիոնավոր դոլարներ վճարված են, բայց Հայաստանի նկատմամբ մատակարարումների պարտավորությունները չեն կատարվում, այդ թվում՝ դաշնակից երկրների կողմից և լրագրողի հարցին, թե դա արդյոք Ռուսաստանի մասի՞ն է, Սիմոնյանն ասաց, որ չի կարող ասել, որ վարչապետի այդ խոսքը վերաբերում է Ռուսաստանին, նման ինֆորմացիայի չի տիրապետում: «Կարծում եմ՝ եթե նման բան կա, դա, միգուցե, կարող է պայմանավորված լինել Ուկրաինայում տեղի ունեցող իրադարձություններով»:
ԱԺ նախագահը վստահեցրեց, որ իր՝ ՌԴ առաջիկա այցի ընթացքում քննարկելու է ՀԱՊԿ- ի հետ կապված հարցերը, Հայաստան-Ռուսաստան փոխօգնության մասին պայմանագրի հետ կապված հարցերը: «Դրանով Հայաստանը դիմել է, և մինչև օրս, եթե ես չեմ սխալվում, մենք պատասխան չունենք: Նույնիսկ «չէ» չունենք»,-ասաց նա:
Անդրադառնալով հարցին՝ եկե՞լ է ՀԱՊԿ-ից դուրս գալու ժամանակը՝ Սիմոնյանը պատասխանեց. «Շատ հնարավոր է, որ ՀԱՊԿ-ն ընդհանրապես որոշում կայացնի դուրս գալ Հայաստանից, որովհետև, եթե այդ կառույցը պատշաճ արձագանք չի տալիս, ես մնում եմ իմ կարծիքին, որ մենք պետք է շատ երկար մտածենք ու հասկանանք: Բայց միևնույն ժամանակ սա խաղ ու պար չէ, որ մենք արագ ինչ-որ կտրուկ շարժումներ անենք՝ առանց հասկանալու, թե հետո ինչ ենք անելու, հետո ինչ է դրան հետևելու: Բայց, այն, որ խնդիր կա, միանշանակ, ես դրա մասին խոսելու եմ»,-ասաց նա:
