Այսօր՝ նոյեմբերի 25-ին, Արցախի Հանրապետության Մարտունու շրջանի Քերթ համայնքում տեղի է ունեցել Կոմիտաս Հակոբյանի անվան միջնակարգ դպրոցի վերակառուցված շենքի բացումը:
Քերթում տեղի է ունեցել դպրոցի վերակառուցված շենքի բացման արարողություն
ՍՏԵՓԱՆԱԿԵՐՏ, 25 նոյեմբեր, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ ներկաները նախ ծաղիկներ են խոնարհել Արցախյան պատերազմներում զոհված ազատամարտիկների հիշատակին Քերթում կանգնեցված կոթողի պատվանդանին և հարգանքի տուրք մատուցել:
Դպրոցի շենքը վերակառուցվել է արմատներով Քերթ գյուղից, «Մոնթե-Ավո» բարեգործական հիմնադրամի հիմնադիր-տնօրեն Աշոտ Ջիվանյան հովանավորությամբ: Կրթօջախի տնօրեն Ստելլա Ղուլյանը մեզ հետ զրույցում նշել է, որ շենքը կառուցվել է խորհրդային տարիներին և գործում է 1974-75 ուսումնական տարվանից: «Դպրոցը նախատեսված է մոտ 200 աշակերտի համար: Ժամանակի ընթացքում ջեռուցման կենտրոնացված համակարգը, խաղահրապարակը, դպրոցի շենքային պայմանները, չնայած ամենամյա վերանորոգումներին, անմխիթար վիճակում էին հայտնվել:
Դեռ 2018 թվականի մարտ ամսին Աշոտ Ջիվանյանն այցելելով դպրոց և ծանոթանալով շենքային պայմաններին, վերակառուցման համար միջոցներ տրամադրելու պատրաստակամություն հայտնեց: Աշխատանքները սկսվեցին սպորտդահլիճից, այնուհետև նորոգվեց երկու դասասենյակ: Կահավորվեց ու ստեղծվեց հարմարավետ, ժամանակի պահանջներին համապատասխան նախակրթարան: Ընդլայնվեց աշխատողների կազմը , քանի որ բացվեցին նոր աշխատատեղեր: Բարերարի նախաձեռնությամբ մեր դպրոցում սկսեցին գործել Ճարտարի արվեստի դպրոցի մասնաճյուղի պարի,երգի,նկարչության,քանոնի և դաշնամուրի խմբակները»,-ներկայացրել է Ս. Ղուլյանը՝ ուսուցչական կոլեկտիվի անունից երախտագիտություն հայտնելով Աշոտ Ջիվանյանին:
Բարերար Աշոտ Ջիվանյանի խոսքով՝ վերակառուցված դպրոցի բացման օրը հատուկ է ընտրվել:
«Նոյեմբերի 25-ին լրանում է իմ հրամանատար Մոնթե Մելքոնյանի ծննդյան 65-րդ տարեդարձը: Ես լեգենդար հերոսի զինվորն եմ եղել, ինչի համար անչափ հպարտ եմ:Ավոն և իր ժամանակակիցները կարողացան հաղթանակ բերել, որը դեռ շարունակություն է ունենալու:Մենք պետք է շարունակենք նրանց կիսատ թողած գործը: Շատերի կհարցնեն, թե ինչու պատերազմից անմիջապես հետո մենք սկսեցինք շինարարական աշխատանքները: Գյուղի բնակիչները կփաստեն, որ պատշարի մուրճի ձայնը կոփել է արցախցու հույսը, հավատը և կամքը: Մեր լինելիության խորհրդանիշ դարձած դրոշը միշտ պետք է ծածանվի,արցախցին երբեք ծնկի չի գալու, շարունակելու է պայքարել»,-ասել է Ա.Ջիվանյանը:
Քերթի դպրոցի վերաբացման արարողությունն ուղեկցվել է մշակութային միջացառմամբ: Ներկա էր Արցախի Հանրապետության Ազգային ժողովի նախագահ Արթուր Թովմասյանը, ԿԳՄՍ նախարարության ներկայացուցիչներ:
