Հավայան կղզիներում գրեթե 40 տարվա դադարից հետո առաջին անգամ ժայթքել է աշխարհի ամենամեծ ակտիվ հրաբուխը՝ Մաունա Լոան: Իշխանությունները Մեծ կղզում ապրող մարդկանց նախազգուշացրել են, որ հարկավոր է պատրաստ լինել վատագույն սցենարին:
Հավայիում ժայթքել է աշխարհի ամենամեծ ակտիվ հրաբուխը
ՍՏԵՓԱՆԱԿԵՐՏ, 29 նոյեմբեր, ԱՐՑԱԽՊՐԵՍ-ԱՐՄԵՆՊՐԵՍ։ Այս մասին հաղորդում է Associated Press-ը:
Մաունա Լոայի ժայթքումն անմիջապես չի սպառնում քաղաքներին, սակայն ԱՄՆ-ի երկրաբանական հետազոտությունների կենտրոնը Մեծ կղզու շուրջ 200 հազար բնակիչներին նախազգուշացրել է, որ ժայթքումը կարող է բավական դինամիկ լինել, իսկ լավայի ուղղությունն ու հոսքի արագությունը կարող են արագորեն փոխվել: Իշխանությունները բնակիչներին հորդորել են պատրաստվել տարհանման, եթե լավան սկսի հոսել դեպի կղզու բնակեցված հատվածներ:
Գործակալությունը նշում է, որ հրաբխի ժայթքմանը նախորդել են մի շարք բավական ուժգին երկրաշարժեր:
Այժմ լավան հոսում է հիմնականում խառնարանի հատվածում և հրաբխի հյուսիս-արևելյան ճեղքերով, ինչը հեռու է համայնքներից:
Մաունա Լոան վերջին անգամ ժայթքել է 1984 թ.-ին: Ըստ ԱՄՆ-ի երկրաբանական հետազոտությունների կենտրոնի՝ 1843 թ.-ից ի վեր հրաբուխը ժայթքել է 33 անգամ:
