Տնտեսավարող սուբյեկտները զգուշացվել են իրացվող ապրանքատեսակների համար սահմանված 15% վերադիրի կիրառումը պահպանելու համար:
Գներն անհիմն բարձրացրած տնտեսվարողները պատասխանատվության ենթարկվելուց բացի կզրկվեն նաև մատակարարումից
ՍՏԵՓԱՆԱԿԵՐՏ, 7 փետրվարի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում տեղեկացրել է Արցախի Հանրապետության հանրային ծառայությունները և տնտեսական մրցակցությունը կարգավորող պետական հանձնաժողովի Տնտեսական մրցակցության պաշտպանության վարչության պետ Հրաչ Ավթանդիլյանը:
«Առավել բարձր և արհեստական բարձրացված գներով իրացման դեպքում՝ նման վարքագիծ դրսևորած սուբյեկտները, բացի օրենքով սահմանված կարգով պատասխանատվության ենթարկվելուց, զրկվելու են նաև ապրանքների հետագա մատակարարումներից»,-մանրամասնել է նա՝ հավելելով, որ Ադրբեջանի կողմից Ստեփանակերտ-Գորիս միջպետական մայրուղու արգելափակումից հետո Հանձնաժողովն ամենօրյա ռեժիմով շարունակում է դիտանցումներ իրականացնել Ստեփանակերտի առևտրային օբյեկտներում՝ ուշադրության կենտրոնում պահելով գնային յուրաքանչյուր փոփոխություն:
Վարչության պետի խոսքով՝ կառույցի և Օպերատիվ շտաբի թեժ գծերի միջոցով օպերատիվ արձագանքում են քաղաքացիներից ստացված բոլոր բողոքներին և իրականացնում ուսումնասիրություններ, որոնց արդյունքների վերաբերյալ տրամադրվում են պարզաբանումներ:
Բացի այդ, տնտեսավարող սուբյեկտների հետ տարվում են բացատրական աշխատանքներ՝ արհեստական գների բարձրացումներից խուսափելու համար:
«Առևտրային օբյեկտների կողմից իրացվող ոչ բոլոր ապրանքատեսակներն են ձեռք բերվում Արցախի Հանրապետության գյուղաջակցության հիմնադրամի կողմից սահմանված կարգով, և հետևաբար հնարավոր չէ լիարժեք վերահսկել գնագոյացման մեխանիզմները»,-ասաց Հ. Ավթանդիլյանը՝ հորդորելով առևտրային օբյեկտներին զերծ մնալ ապրանքատեսակները շրջափակմանը նախորդած ժամանակահատվածի համեմատ ընդգծված բարձր գներով և առանց հիմնավոր փաստաթղթղերի ձեռքբերումից և իրացումից :
Ըստ մեր զրուցակցի՝ շրջվարչակազմերի աշխատակիցների կողմից դիտանցումներ են իրականացվում նաև Մարտակերտի, Ասկերանի և Մարտունու շրջաններում: Արձանագրված թերացումներն ու խնդիրները համապատասխան կարգի համաձայն, հաշվառվում են:
ԱՀ հանրային ծառայությունները և տնտեսական մրցակցությունը կարգավորող հանձնաժողովը քաղաքացիներին հորդորում է անբարեխիղճ երևույթների ականատես լինելու դեպքում անմիջապես ահազանգել թեժ գիծ՝ 047-95-95-55:
