Ստեփանակերտի Կոմիտասի անվան երաժշտական դպրոցում նախօրեին կազմակերպվել է մշակութային միջոցառում՝ կրթօջախի այն սաների վերադարձի կապակցությամբ, ովքեր Արցախի շրջափակման հետևանքով մեկուկես ամիս գտնվում էին Երևանում։
Ստեփանակերտի երաժշտական դպրոցում երաժշտական միջացառմամբ դիմավորել են մեկուկես ամիս անց Երևանից վերադարձած սաներին
ՍՏԵՓԱՆԱԿԵՐՏ, 8 փետրվարի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ միջոցառման ընթացքում տեղի է ունեցել նաև Երևանում 2022 թվականի նոյեմբերի 22-ին կայացած «Մեղեդի» մեներգիչների համահայկական մրցույթ-փառատոնին պատվավոր տեղեր գրաված մասնակիցների պատվոգրերի ու մեդալների հանձնման արարողություն։
«Մեր ժողովուրդը դարեր շարունակ պայքարել է հայ մնալու, իր հողում ապրելու, արարելու իրավունքի համար։ Եվ այսօր նույն խնդրի առաջ է կանգնած արցախցին։ Չնայած բոլոր փորձություններին, մենք մնում ենք անկոտրում և լավատես։ Մեր դպրոցի սաները պատվով հաղթահարեցին մեկուկես ամիս ընտանիքներից հեռու գտնվելու դժվարությունները։
Տեսնելով նրանց ուժեղ կամքը՝ մենք պարզապես իրավունք չունենք հանձնվելու, պիտի շարունակենք ապրել ու արարել Արցախում»,-ասել է երաժշտական դպրոցի տնօրեն Զարինե Բալայանը։
Միջոցառումն ուղեկցվել է սաների երաժշտական կատարումներով։
